【港超聯】追隨何國泉加盟北區 龐焯熙：已學識調節大比數落敗的心態
【獨媒報導】均業北區今季續戰港超聯，球隊今季迎來大變動，簽入多名年輕球員，包括曾效力香港U23、晉峰的守門員龐焯熙。從香港U23、晉峰，龐焯熙連續兩季都是榜尾球隊的守門員，在多場賽事中經歷大比數落敗，更曾試過「輸到喊」。不過，龐焯熙稱已累積了不少經驗，學會調整該種不好受的心態：「唔好好快就一蹶不振，會調整到繼續幫返隊波，令到比數逆轉。」
同獲九龍城邀請 加盟北區因需要出場時間
早前入選港隊名單的龐焯熙，今季轉投北區，他形容「幾興奮，有新挑戰」：「希望盡量幫到隊波，盡量表現到自己。」在晉峰宣布退出港超聯後，龐焯熙透露接獲九龍城主教練陳銘剛的邀請，又曾與傑志的教練作討論，最後在北區副總監何國泉的力邀下，決定加盟該支區隊：「同咗其他前輩，同埋何Sir 傾，佢哋都係覺得我個年紀，都係需要出場時間。」
二人原來早有淵源，龐焯熙自小學便跟隨何國泉，早在太陽國際體育會已是其學生，「跟返佢練會進步多啲」：「本身喺晉峰都係因為佢呀嘛，跟住借咗出去就無跟佢練，跟住今年跟返佢囉。」
龐焯熙：每場都要好過上一場，每場都要進步
談到今季加盟北區的目標，龐焯熙就明言「沒有目標」，因為曾經覺得好大壓力：「我要clean sheet，每個龍門都想，但係發覺做唔到，心態就開始要調整，宜家就覺得冇一個好指定目標。每場都要好過上一場，每場都要進步。例如每場波之前都定一啲目標，如果今日失咗幾多球，就要撲得多過個失球數字。一方面令到我自己心情容易啲，另一方面有滿足感、成就感。」
均業北區今季簽入兩名南亞裔新球員，23歲、巴基斯坦裔的簡嘉亨是其中一人，他前季效力冠忠南區，並代表香港出戰亞洲盃外圍賽。簡嘉亨去季轉投港會，在對北區的賽事揮拳打向張俊軒，導致兩隊發生衝突，他事後在社交網站發文道歉。
簡嘉亨：今年好重要 盼爭取表現重返港隊
簡嘉亨今季獲何國泉邀請加盟北區，他表示十分高興，希望交出好表現，以力爭重返港隊，並形容「今年好重要」：「Feel 到一個職業球隊啦，個個都知道嗰邊啲練波嗰啲嘢，呢度就fit 返練波嗰啲嘢，都好開心。」他表示協助北區贏波最重要：「出場都緊要，但希望唔好傷啦。」
另外，深水埗去季殺入足總盃決賽，最終不敵東方，球隊最後未能籌得足夠班費，宣布自降甲組。印度裔後衛波比表現備受好評，他對能夠加盟北區感到興奮，希望能在隊友身上學得更多，「想攞好啲嘅result」。
波比：期望更多少數族裔球員出戰港超聯
波比稱在知悉深水埗自降後感到失望：「諗緊會唔會有球隊踢到，最尾北區有搵我，好happy呀，可以超聯再踢波，可以再努力啲比其他人睇到。」至於今季目標，波比稱，去年協助深水埗晉身足總盃決賽：「今年想贏埋，呢個係我自己嘅目標，想同全部球員一齊努力啲。」
現年25歲的波比，他最後勉勵其他印度裔的小朋友繼續努力，期望會有更多少數族裔球員，能夠征戰港超聯：「If you can keep on going everyday, nobody can stop you. I hope I can be a good model for everyone。」