「回應」全職運動員低薪 楊祖賜：教練醫療住宿「包晒」、冇乜嘢要使錢
【獨媒報導】港隊在巴黎奧運贏得兩金、兩銅的佳績，外界關注政府對全職運動員的資助，現時全職運動員每月標準資助額最低為7,130元，取得奧運參賽資格的標準資助則為11,520元。港協暨奧委會義務秘書長楊祖賜接受訪問時稱：「雖然佢嘅人工唔係好高啦，相對嚟講，香港平均大概二萬幾，但係佢所有配合嘅嘢，差唔多係一個相當之高數字嘅投資嚟㗎，無論教練、醫療，住宿包晒。嚴格嚟講，佢係冇乜嘢要使錢，可以咁講。」
根據體育學院現時制度，全職運動員每月標準資助額最低為7,130元，取得奧運參賽資格可列為「精英丙」，每月標準資助為11,520元，在奧運贏得獎牌的「精英甲+」運動員，即張家朗及何詩蓓，每月標準資助則為44,500元。
楊祖賜昨日在《無綫新聞》節目「講清講楚」表示，體院全職運動員的教練、醫療，住宿獲當局「包晒」、「冇乜錢要使」，當運動員沒有後顧之憂，集中點便會「好很多」：「我當一啲零用錢，當你大學有贊助，即係大學生嘅時間有獎學金，應該可以係好從容咁樣做運動員，喺無壓力之下做運動員，喺體院或者各方面時間，佢應該可以盡量發揮自己。」
楊祖賜（資料圖片）
讚港隊成績世界級 楊祖賜：絕對係只有過之而無不及
港隊在上屆東京奧運贏得一金、兩銀及三銅的成績，今屆獎牌數量有所不及。楊祖賜認為，今屆成績已屬世界級，指港隊前往巴黎的時候，未有想過可以贏得甚麼獎牌。他認為，最重要是運動員的心態和自由發揮，而港隊今次的表現不但是世界級，更絕對是尊重的一種能力。他舉例指在100米游泳、劍擊的成績相差甚近，「全部講緊尾數後」：「大家已經去到同一個水平，反映咗香港嘅運動員係世界級質素。」
本身是輔警總監的楊祖賜，今次以港協暨奧委會義務秘書長身份隨團到巴黎，他稱在現場看足四日比賽，每晚只睡了兩小時，以檢視運動員的鬥心及發揮，「同其他運動員比較，絕對係只有過之而無不及」。
楊祖賜（資料圖片）
稱現時發展方向健全 投放獎牌希望運動員資源足夠
在今屆巴黎奧運，兩面金牌均來自劍擊，被問到是否應發展成「劍擊之都」，楊祖賜稱「絕對唔會咁睇」，認為市民對劍擊以外的其他運動都有興趣：「政府係自由化嘅。對於市民甚至乎我哋睇得到嘅運動，佢哋某方面值得發展嘅時候，我哋就會令到佢發展。」他認為現時體育發展的方向健全，投放在獎牌希望運動員的資源足夠。
被問到取得奧運資格的運動員較去屆減少，楊祖賜就認為從人數而言，難以評估是否需要量多，指今屆35名運動員中，20人屬於首次參賽：「我睇得到佢哋嘅表現，絕對唔輸蝕其他國家代表團嘅運動員。」他讚揚划艇、單車運動員，尤其李思穎在女子公路賽完成比賽，又舉例指張家朗，在2016年奧運男子花劍16強止步，及後卻連續兩屆奪金：「代表每一個運動嘅訓練基礎，係不斷咁樣進步，而呢一種影響力係潛移默化。」
張家朗（圖片來源：FIE - International Fencing Federation）
部份運動員退役不影響傳承 楊祖賜：一二三隊排緊隊
楊祖賜表示，本港運動員在國際舞台已達到很高的認同性，並指部份新興項目的潛質越來越大：「當普及化越嚟越犀利嘅時間，香港嘅市民能夠可以接觸嘅機會一定係多。」他認為，昔日只有經濟環境較好人士才能參加奧運，現時在政府支持下參加不同康體發展之外，能夠發揮潛質的市民都有機會參與。
對於江旻憓宣布退役，及何詩蓓仍未決定下屆是否繼續征戰，會否影響傳承。楊祖賜不同意，指政府與香港體育學院方向一致，形容「一二三隊排緊隊」，相信健全制度十分重要，強調從普及化做起，絕對不會只集中在個別運動員，而是整體化令他們發揮潛質。
楊祖賜（資料圖片）
指政府購入轉播權正確 楊祖賜：全香港商場爆得好緊要
針對今次巴黎奧運，楊祖賜指港協暨奧委會派出特別公關及新聞團隊到當地加強宣傳工作，包括將每名運動員的訪問帶回香港：「以往好難做，宜家都唔容易做，因為喺現場做，大家都明白我哋團隊唔大，我哋能夠入場嘅卡係相當之少。」
另外，政府今屆再次購入奧運轉播權，楊祖賜稱「呢個支持方式相當之正確」：「你睇得到全香港嘅商場，喺時差之餘，我都覺得真係好犀利，爆得好緊要，市民對呢方面嘅渴求非常之高。」至於是否應購入其他大賽的版權，楊祖賜認為，當局要視乎比賽的認同性或認受性：「譬如世界盃，或者足球咁先算，係咪全香港，或者我哋每一個細小角落嘅人，都想睇呢樣嘢。」