港隊劍擊代表何瑋桁：曾做兼職賺外快 為慳錢每餐都在體院食飯
【獨媒報導】港協暨奧委會義務委書長楊祖賜早前指，本港全職運動員的教練、醫療及住宿獲「包晒」，現時每月標準資助額7,130元屬「零用錢」，言論引起爭議。港隊劍擊重劍代表何瑋桁接受訪問時表示，曾在休息期間做兼職以賺取外快，不少體院運動員都有該情況，並透露自己為了「死慳死抵」，試過每餐都留在體育學院內用餐。對於社會有聲音建議，政府應調整全職運動員薪酬，何瑋桁認為：「如果有得加當然係最好啦，個個人都希望有好啲嘅待遇。」
現年28歲的何瑋桁，代表港隊出戰巴黎奧運男子個人重劍，雖然32強比賽中落敗，但已為時隔12年後再有港隊選手躋身奧運男子重劍項目。何瑋桁今早接受商台節目《在晴朗的一天出發》訪問，自言很好彩，一直獲家人支持參與劍擊比賽：「我有需要，佢哋就會即刻幫我。屋企人都同我講，你宜家唔使俾（家用）住，遲啲你有能力先至俾返。」
圖片來源：港協暨奧委會
中六畢業後加入體育學院 家人支持追夢
在中六畢業後，何瑋桁便成為體育學院全職運動員，他笑言劍擊很有型，而且是高強度、耐力及競技類的刺激運動。他原本想中四便轉為全職運動員，家人喚他先完成中學課程，亦一直支持他追夢。
在現時制度下，香港頭四名運動員參加亞洲青年錦標賽、亞洲錦標賽及世界盃等，才會獲體育學院資助。在低潮期間的9個月，何瑋桁就要靠家人資助才能參與比賽：「劍擊所有比賽，基本上都係無獎金。」 對於6,000元是「零用錢」的說法，何瑋桁稱當時年紀相對較小，「真係好似零用錢咁樣嘅」，但在外出比賽的時候，亦會選擇在鄰近地區，及較重要的賽事才參加。
圖片來源：港協暨奧委會
上屆外圍賽出局後陷低潮 曾想過放棄做全職運動員
在上屆東京奧運外圍賽，何瑋桁在出局後有感對不起隊友：「香港唔係好多運動員可以參加呢個外圍賽去競選，但係我自己就好似心態未控制得好，發揮得唔好，令到自己輸咗，嘥咗個機會⋯⋯咁跟住就質疑自己，係咪冇能力做。」
在落敗後，何瑋桁開始質疑自己，在本地比賽發揮亦欠佳，甚至想過放棄繼續做全職運動員：「嗯，worse 嘅情況去到差唔多⋯⋯全香港排名跌出前十名，就唔可以再留喺體育學院入面練習，連練習嘅機會都冇。嗰個時候都諗，我係咪應該放棄呢，我係咪已經做唔到呢？」
圖片來源：港協暨奧委會
感謝隊友教練支持 何瑋桁：就算無成績都會想繼續
不過，何瑋桁一直以晉身奧運為目標，加上在隊友及教練的支持下，成功再次站起來：「因為嗰一段時間大陸教練唔係正式體院教練，佢係義務教練。佢唔suppose 咁樣幫我，但係佢都好用心去教我，我覺得唔好辜負咗⋯⋯呢個教練對我咁用心嘅幫助。我就好努力嘗試去pick up自己。隊友都俾咗好多鼓勵說話我，話我哋好需要你，你得㗎、你做到。」
何瑋桁透露，即使在去年杭州亞運贏得兩面銅牌，仍認為自己沒有機會參與奧運，最後憑著信念沒有放棄：「我肯花更大嘅力，係因為我自己覺得，我好鍾意呢個運動。我自己好鍾意呢個運動⋯⋯就算有冇成績都好，我自己好鍾意，就會想繼續去做呢樣嘢，不論去唔去都奧運都好呢，我一定要繼續做。」
圖片來源：港協暨奧委會
同意前人種樹說法 力爭下屆奧運入場券
談到男子重劍終於「出頭」，何瑋桁同意前人種樹的說法，指不少前輩在劍擊仍非精英項目的時候，不斷自資參賽，再教導新一批運動員：「運動呢樣嘢唔係一時三刻就做得好好，通常都要長年累月去浸先有一定成績。」
何瑋桁現時世界排名20，目標是短期內衝上頭16位，爭取2026年洛杉磯奧運的個人及團體賽入場券。另外，何瑋桁銀色dreadlocks 的髮型甚為搶眼，他指起床後不用特別打理，只需要紮辮，但需要用較多時間清潔。在奧運期間每日都要練習，但他仍會早起床洗頭，並花上一小時吹頭。
在訪問中，何瑋桁笑言，會一邊吹頭一邊看電影或動漫：「覺得自己細個，就好似咩都試吓，同埋覺得幾型就整吓。」他表示，在換上dreadlocks 髮型後，連續取得奧運資格及贏得亞洲錦標賽冠軍，「希望將Lucky帶到落奧運」。