田啟文：再有戲院結業反映投資者抱觀望態度 對業界是不好的訊息
（獨媒報導）九龍城影藝戲院因租約期滿下周一結業，香港電影工作者總會發言人田啟文認為，今次再有戲院結業反映投資者抱觀望態度，對業界來說亦是不好的訊息：「因為戲院唔同開個茶餐廳，佢要啱一個合適嘅地方，然後佢要投資落去。」他指出，九龍城影藝戲院在2019年開業，5年租約屬業界「一定要」：「唔係投資咁大落去，佢點樣都唔會收得返。所以好清晰嘅數字，話咗俾大家聽計唔掂數，唯有唔做住囉。」
位於九龍城廣場內的影藝戲院在2019年12月開業，連同早前MCL海怡戲院，本港今年累計有6間戲院結業。文化體育及旅遊局局長楊潤雄日前表示，不能單從一間戲院結業便說業界生意差，強調要按實際情況作判斷，而本港戲院座位數目過去數年亦有增長。
香港電影工作者總會發言人田啟文（資料圖片）
開業僅5年便結業 田啟文：係一個唔係幾好嘅訊息
對於再有戲院結業，田啟文今早接受港台節目《千禧年代》訪問，他形容「係一個唔係幾好嘅訊息」：「有第二間結業，我就講緊好嚴峻啦。」田啟文強調，戲院結業有不同原因，例如星影匯涉及九龍灣展貿中心重建，今次則因租約期滿結業：「好明顯睇到一個訊息就係，持分者、營運者或者包括業主，大家都喺度達唔到一個好好共識。」
在節目中，田啟文指九龍城影藝戲院開業僅5年便結業，在商業考慮上「傾唔到一個可以共存嘅地方」。九龍城影藝戲院由銀都娛樂經營，田啟文指對方屬行內「好有實力」的公司，去年已接手同因租約期滿而結業，位於銅鑼灣翡翠明珠廣場、原為 Cinema City JP的戲院，在開業的時候亦辦得有聲有色。
營運數字上升不等於戲院「賺多咗」 業主按營業額拆賬
被問到本港電影票房去年上升，戲院經營環境是否外界想像般困難，田啟文就指營運收資追不上營運成本，業主會按營業額調整租金及拆帳：「營運數字多咗，唔代表係戲院賺多咗，一張戲飛要同片主拆帳。唔係純粹10萬蚊租，就交10萬，唔係咁樣計數。如果有得做嘅，無人會結業㗎啦，係咪？呢樣係事實嚟㗎嘛。」
談到有市民北上睇戲對本港戲院的影響，田啟文稱不會覺得太大影響，但數據直接影響內地電影在香港上畫：「宜家知道嘅排片，內地戲一定內地上先，然後香港係滯後。如果要睇嗰啲戲，基本上香港嘅人上去消費嘅時候，就已經睇咗。所以數據好清晰話俾大家知，內地收幾十億嘅票房，嚟到香港都唔理想，就係咁嘅原因囉。」