【港超聯】趙正宇離隊轉戰泰國T3 李輝立：唔明點解佢會去
【獨媒報導】港超聯球隊標準流浪下周五（30日）晚迎來揭幕戰，球隊今日舉行開季發佈會。球隊今季改組青春班，不過名單中就不見年僅18歲、去季表現亮眼的趙正宇。總幹事李輝立指，趙正宇突然轉投泰國T3球隊，並指該球會由青年軍組成、欠缺組織，不解對方的決定。
流浪今日公佈25人大軍名單，暫時已至少有11名U22球員，不過上屆菁英盃「星中之星」的趙正宇就不在名單之中。《獨媒》問到他今季去向，總幹事李輝立就稱趙正宇突然轉投泰國T3球隊：「宇仔比較複雜，我唔明點解佢會去到T3度踢，係支冇乜組織嘅球會，讀書唔會選擇去泰國呀嘛？去泰國讀乜嘢呀！」
質疑經紀另有目的 稱球會不懂轉會程序
李輝立指趙正宇初期只表示到英國讀書，但後來突然離隊，並質疑其經紀背後另有目的：「你知宜家球圈啲經紀搞到好亂吓㗎嘛，佢乜都應承你，到頭嚟唔知係唔係。」Philip 續指球會已很小心處理，曾聯繫香港足總及泰國足總核實是否有該球隊，「最後都問唔到，好似係啱啱由青年軍組織、升上嚟嘅球隊。佢哋又咩都唔識，連TMS（國際足協轉會系統 Transfer Matching System）都唔識，要叫返泰國教佢哋點做。」最後在足總協助下，趙正宇准以「借用」身份外流。
李輝立：球員有離心無法挽留
趙正宇上季為流浪上陣21場、攻入3球，本月初更首次入選港足下月作客斐濟三角賽的46人初選名單。李輝立慨嘆：「其實佢選香港隊都踢唔到啦，我唔知佢目的係乜嘢。」他指趙正宇與流浪有三年合約，「我哋捧佢捧到咁高，啲經紀以為佢好犀利，但我覺得好奇你無理去踢T3囉。」他續稱有責任了解球員去向：「你賣咗個人扔咗你去柬埔寨，割咗一邊腎扔返嚟，咁咪死囉！我哋都好關注，細路仔喺我哋度培養走咗去。」
李輝立又有感而發稱球員有離心，亦無法挽留，唯有祝願對方飛黃騰達：「有朝一日需要返嚟香港咪返踢。」
被問到有否打亂球隊預算，李輝立就稱沒有大影響，指很多年青球員都在等機會，強調指今季的人腳「優質」，指李呈、黃韜霖、張青雲都是可造之材，「喺我眼中都係值得培訓」。
另外，李輝立就稱陳耀祖因身體抱恙，剛完成手術，需要休養兩至三個月，短期內未能歸隊。