【港超聯】大埔小勝續保不敗之身 謝家榮：主場贏傑志感覺好好

【獨媒報導】港超聯在酷熱天氣警告下上演「列強戰」，大埔主場1：0小勝傑志，繼續保持今季聯賽的不敗之身。謝家榮在比賽後對贏波感到高興：「主場贏傑志嗰感覺好好，加上自己clean sheet，喜上加喜啦，所以對我嚟講係perfect game 嚟。」在訪問期間，隊友盧卡斯剛好經過並大喊：「Best goalkeeper in Hong Kong！」謝家榮就顯得靦腆說：「唔洗理佢，唔洗理佢。」

在今仗之前，兩隊均在港超聯保持不敗，傑志、大埔分別排積分榜排第二及第三。「綠戰士」今場派出六名巴西兵，包括馬卡雷拿、柏連尼、盧卡斯、馬高斯山度士、伊高沙托尼及隊長加比爾，配合港隊代表謝家榮及陳肇鈞，馮冠鳴亦續任正選。

傑志在開季錄得兩連和後，近日已連續三場大炒對手。「藍鳥」亦盡遣六名外援任正選，包括守門員泰利、新兵鄧達思、明加索夫、韋頓、馬查度及利亞倫，羅梓駿以右閘姿態登場，費蘭度、潘沛軒均先任後備。

半場互交白卷 伊高沙托尼表現活躍

上半場傑志先開波，兩隊初時處於試探階段，大埔採取長傳反擊。傑志則以短傳組織攻勢。20分鐘，祖連奴分往右路，韋頓接應射斜。23分鐘，韋頓禁區頂轉射門中楣，兩隊半場互無入球，踢成0：0。

下半場換邊，傑志換入費蘭度，續保持控球在腳的踢法，53分鐘，大埔亦換入新晉港腳尼高拉斯。59分鐘，尼高拉斯左路傳中，伊高沙托尼門前竟炒高。64分鐘，盧卡斯中路發難再分往右路，伊高沙托尼推順遠射，泰利單拳打出。

盧卡斯一箭定江山 大埔末段全軍退守

戰至71分鐘，馬高斯山度士左路處理罰球，他放長波到禁區外，顏卓彬用頭未能解圍，盧卡斯甩開對方緊纏再順勢射入，大埔領先1：0。在落後下，傑志大軍壓境。

79分鐘，祖連奴禁區內妙傳費蘭度，後者乖巧地射向遠柱，眼看正要入球之際，韋法頓護空門，替「綠戰士」力保不失。大埔在末段換入羅振庭、杜國榆及李樂謙，陣式上全軍防守，在補時8分鐘下，最終成功守住1：0的比分完場。

在大埔擊敗傑志後，港超聯的不敗之師只餘下「綠戰士」及東方。另外，今場入場人數為1,446人，足總技術總監莫寧、傑志會長伍健都有入場觀戰。

李志堅：今季聯賽長路漫漫 只能繼續努力

在比賽後，大埔主教練李志堅對贏波感高興，但表示今季聯賽長路漫漫，在三循環下「而家先係第五場」：「自己繼續努力，希望keep 到啦。」對於再次在比賽期間，換走陳肇鈞會否有「壓力」，李志堅強調，從來不會有壓力：「我打份工為球會，大家都係為球會，最緊要件事幫到球會。」他透露，盧卡斯在比賽末段亦主動要求換出，由後衛入替：「佢自己無㗎啦，打到盡咗，我反而覺得係好appreciate。」

李志堅又笑言，個人不喜歡說甚麼全季不敗：「我自己就唔會啦，踢波，坦白講呀，有咩可能係keep 住場場咁樣。」他認為即使大埔今場落敗，但「打場好波」亦已經有交代。

被問到大埔近季都「食住」傑志，李志堅立即笑稱「唔好講呢啲」、「喂又講呢啲」：「唔關事嘅，你咁樣理解啦，一個領頭羊嘅球隊，一路喺港超，好多球隊想打佢都好正常，球員自己都好focus。」他重申，大埔今季每場都「去盡」，「唔關邊隊事」。

李志堅：贏到梗係想贏 惟望年輕球員盡快接班

繼季初擊敗衛冕冠軍理文，今場再贏傑志，在餘下賽程會否有壓力。李志堅則表示，「呢啲係我嘅工作嚟」，但認為球隊除了爭取好成績，亦要培養年輕球員，並點名尼高拉斯、李樂謙要盡快接班：「無論咩情況，我都要換佢哋出嚟。」

李志堅最後重申「贏到梗係想贏」：「你睇到，雖然話我哋今年多咗啲後生嘅，但你compare with 其他，人哋換前鋒、外援都係有分別，我哋收埋咗盧卡斯之後，只能夠換防守出嚟。換走伊高，我都係只能夠換個防守出嚟，你講鬼嘅話。當然我哋都希望爭取好成績，但長遠我哋應該係develop。」

謝家榮賽後激動 下周再撼「藍鳥」前先取下馬威

大埔守門員謝家榮在賽後顯得激動，他指看到傑志近期回勇，形容對方「永遠都唔會係一隊容易對嘅對手」：「佢哋永遠都係所有球隊嘅目標嚟，始終都咁多年班霸。」

謝家榮強調每場勝利都激動，但今場則贏得有點艱辛：「好擔心會唔會好似上次對南區咁樣，最後1秒先俾人追和呢。我唔想再發生，個腦唔想去諗，但控制唔到，好驚最後1秒又俾人追和。」他又感謝隊友盧卡斯取得入球，稱入球對該名巴西射手來說是很大的鼓舞。

被問到贏傑志是否有助增強球隊信心，謝家榮亦稱今季聯賽三循環，現時只是10月，仍存在很多變數：「但每一場都好緊要，對我哋嚟講，尤其對列強球隊，每一場都係6分波。下個禮拜銀牌又對傑志，今場贏咗佢哋，叫咗攞個下馬威，有支強心針先。」