【亞冠二】東方球迷完場後續鼓掌支持：低潮都齊上齊落
【獨媒報導】上季因獲足總盃冠軍，再次能代表香港出戰亞冠二賽事的東方，由於投資減少加上多名主力離隊，實力大受影響，已連敗三場亞冠二小組賽。昨晚東方在旺角大球場主場迎戰泰超球隊拉查武里，再次出現一場大敗，比數更是0比7。完場時，有東方球迷傷心拭淚，不過球員走到球迷區時，球迷仍為球員拍手歡呼至離場。
已支持東方十年的球迷Jack坦言「呢個比賽係難以接受嘅」，認為球隊位於重整期，雖然表現未如理想，但會堅持繼續為東方打氣，「始終我哋攞冠軍時一齊慶祝，咁低潮嘅時候一定跟球隊齊上齊落」。
東方今季應對亞冠二的態度，包括未有強力增援甚或派出年輕球員出戰，在球迷間已飽受批評。今仗比賽開始前，《獨媒》找來東方球迷Jack訪問，問及坊間對球隊的批評。
Jack
Jack表示，東方今季陣容大變，而新加入球員仍需時間磨合。他稱以球迷角度而言：「我哋輸得更加多嘅嘢，大部分以前都試過，好似以前輸俾傑志1:8，我哋都係咁樣過去，其實而家又已經好過以前好多。」
對於東方連敗將影響本港球隊在亞洲賽的積分，甚或將失去亞冠二參賽資格。Jack承認以其他香港球迷角度，或認為「點解東方幫唔到香港攞分㗎，又可能波又入得少，又唔好睇。」不過他指個人作為東方球迷，認為東方贏得上屆足總盃冠軍，有資格參與亞冠盃比賽，而東方向來以踢更高水平的賽事為目標，「所以亞冠二資格都係我哋目標，我都好支持繼續喺足總盃度力爭衛冕。」
東方在第三場分組賽作客泰國，派出17歲高銘浩及16歲王飛揚任正選，收起不少常規主力。教練盧比度及後更稱東方的目標與另一支出戰亞冠二的球隊大埔不同，以培育年輕人為主。
對於球隊的做法，Jack指東方去年亦派出不少年輕球員作賽，包括已轉投內地球會的馬希偉及吳宇曦，「我哋需要俾啲時間佢哋去培訓，俾啲機會佢哋去出場」，其實要強華人，就係要球會造出嚟、訓練出嚟，先至會有正選輸俾香港隊。」
此外，Jack認為東方傷兵亦是影響成續的其中一個因素，包括費利浦薩及加利安，丹尼爾僅傷癒復出，洛迪古斯亦不在狀態。球隊本季亦有增兵，例如拼勁十足的大久保優，以及曾效力理文的基華尼頓。
「我自己都睇咗好多年，其實要睇贏嘅輸嘅都好多都睇過，贏嘅咪一齊贏、輸嘅一齊輸，呢個係我哋東方球迷嘅特質」。
昨晚的比賽，東方未再派出年輕球員任正選，而是派出常規正選。上半場雖然踢成0比0，但下半場兵敗如山倒，以0比7落敗。東方大比數落後時，現場已陸續有球迷離席。
完場後一如以往，東方球員走到球迷區致謝，在場球迷未有因賽果大鬧球員，仍然為他們拍手歡呼至球員離場，亦有球迷大叫「又唔係未捱過」，不過亦有球迷傷心拭淚。
賽後Jack向《獨媒》坦言「呢個比賽係難以接受嘅」，但依然會堅持為東方打氣，「始終我哋攞冠軍時一齊慶祝，咁低潮嘅時候一定跟球隊齊上齊落。」。一如東方球迷打氣歌：「We singing together, Eastern together」，「贏輸都唔會影響支持球隊嘅心態」。