【獨媒報導】港足晚上主場以1：2不敵新加坡，無緣晉身2027年沙特阿拉伯決賽周。港隊球員茹子楠在賽後接受訪問時顯得失落，表示感到傷心並向球迷說對不起：「對唔住，知道大家對我哋好大期望，我哋其實自己都收到晒大家嘅支持，我哋輸咗波都留喺度支持我哋，好感激佢哋，我哋會好好反省，希望日後可以開開心心謝場，再一齊離開球場。」

在比賽後，新加坡球員在更衣室大叫Asian Cup，歡呼聲更傳到混合採訪區。另外，港隊球員需途經混合採訪區離開球場，惟啟德體育園職員未開閘，足總職員一度束手無策。

王振鵬賽後未有接訪問 擰頭說Sorry 後離開

今場續任正選守門員的王振鵬，他在賽後未有接受傳媒訪問，向記者擰頭說Sorry 後便離開。茹子楠則對輸波感到傷心，加上正式出局是雙重打擊，「純粹唔開心因為輸波」。

在去年亞洲盃決賽周，港隊在分組賽三戰全敗，無緣晉級淘汰賽。茹子楠在賽後失聲痛哭，並向記者表示「香港隊無終點」。一年過去，港隊再遇挫敗，《獨媒》問到輸波的影響，茹子楠認為比賽必定有輸贏：「嗯，都係一場波，睇吓可以點樣檢討返，我哋之後睇吓⋯⋯for 我哋第時升上嚟嘅年青球員又好，我哋留喺度嘅又好，幾年後又有一次機會，再準備下一次機會。」

談到港隊遭對手反勝的原因，茹子楠認為已做好教練部署，但一時不集中便失波：「其實人哋都唔係好多機會，可能真係幾秒嘅時間就失波，仲輸埋場波。」

兩隊賽後一度爆衝突 陳晉一指運動員應有基本尊重

在比賽後，兩隊球員更一度爆發衝突，陳晉一在賽後強調「球場事球場了」，但認為運動員應該有基本尊重：「贏波恭喜佢哋，的確表現、任何嘢而家唔評論住。嗯，足球有時候係好殘酷嘅，佢哋出線，但如果無應有尊重的話，我覺得係會發生呢啲事。」陳晉一表明，下次再遇到新加坡不會手軟。

《獨媒》追問陳晉一，新加坡球員在賽後是否出言不遜，包括侮辱港隊球員。陳晉一指「咩都有」，重申「球場事球場了」：「可能咁啱嗰吓心血上到嚟、上腦，係會發生呢啲事，但如果基本尊重無嘅，我自己接受唔到呢個行為。」

對於今場被視為港隊近年最關鍵的一戰，被問到輸波對香港足球的影響，陳晉一形容為失望，但指對香港足球的影響則要交由高層：「球員只能夠踢好場波，做好自己嘅本份，每日練波、比賽爭取贏波，不論乜對手100%。」

盼賽事對持分者有正面影響 陳晉一：希望球員繼續外流

陳晉一又希望，港隊在啟德主場的賽事，乃至整個亞洲盃外圍賽能給予足總、持分者正面影響：「見到呢個地方好多人支持呢樣嘢，嗯，我哋希望做好，唔好將建立咗嘅嘢推冧再嚟多次，呢個Fanbase 可以繼續向上，球員繼續外流，繼續去爭取更加多。」

在完場後，陳晉一與一眾隊友走向球迷區感謝香港球迷支持：「我覺得不論咩結果，好多謝佢哋一直都喺度，不論我哋贏波輸波，有唔如意嘅結果，到今日令大家失望，我哋作為球員真係好傷心，見到球迷都不離不棄，我哋有責任揹返輸波嘅責任。嚟緊嘅路唔易行，希望會見到大家。」

版權: 
禁止衍生