葉先生在受訪期間落淚

（獨媒報導）宏福苑火災獨立委員會今舉行首天聽證會，會上披露棚網造假、房屋局獨立審查組（ICU）曾在巡查前預先通知承建商、勞工處未發現證書造假等內情。妻子在大火中罹難的宏泰閣遺屬葉先生，今天以涉事方身份出席聽證會，他在會後批評政府的巡查「流於表面」：「佢睇其實好求其，係真係假，睇嗰個人都唔係好在意」。他又形容，今天披露的種種資料很多都有震撼性：「我哋以前都唔知道。令我哋感覺好嘩然，原來好多事都係假嘅，好似一連串互相遮掩。」


葉先生

居民錯失逃生黃金時間 期望報告解釋

葉先生在會後接受傳媒訪問，稱印象最深刻是棚網問題：「你可以話係一個商業考慮，但好肯定嘅係一個處心積慮嘅做法。」他又批評，政府的「所謂巡查」流於表面，令人感到震驚。

「今日攞出嚟嘅資料其實好多都好震撼性，我哋以前都唔知道」，他指雖然心裡有數，「但係佢公開出嚟嘅係，令我哋感覺好嘩然，原來好多事都係假嘅，好似一連串互相遮掩」。

另外，葉先生在今天的聽證會聽到居民逃生細節，「包括我太太在內，好多死咗嘅街坊都係，喺一個原本應該有足夠逃生嘅黃金時間裡面，嗰個逃生時間變得好短，根本唔足夠。」葉先生期望專家報告能告知為何火勢、濃煙會迅速蔓延。

葉先生表示接下來都會繼續出席聽證會，因他對事件仍有很多疑問，「點解個火可以喺咁短事件蔓延得咁迅速、燃燒得咁猛烈？」、「我哋祈求得到真相。」


資料圖片

宏泰居民：賺錢賺到盡、好冇人性

宏泰閣居民李小姐今天從打鼓嶺過渡性房屋博愛昇平村遠道而來，同樣對會上提及的棚網問題印象深刻，「我覺得好荒謬，如果係事實，點解佢哋為咗賺錢賺到盡，罔顧安全？我覺得佢哋好冇人性。」

回想大維修時，李小姐受到很大影響。由於宏福苑被棚網、發泡膠圍封，依靠氧氣機維生的家人沒有新鮮空氣，李小姐一度只能帶他搬走。

經歷種種不便卻換來如斯下場，更有多名認識數十年的朋友、鄰舍離世。她認為部門之間「系統性環環相扣，彼此之間都有責任、疏忽。」李小姐希望聽證會「可以俾受死嘅災民一個公平。佢哋真係好冤枉。」


宏泰閣居民李小姐

宏盛居民批至今無人問責：真係好多人有責任

宏盛閣何小姐稱今日僅多了少許資訊，需要多聽幾場才有結論：「知道邊啲人多啲負責任，同埋真係投訴過好多次冇人理。」她又嘆，事發至今近四個月，仍未有任何政部門被問責，「我哋（居民）都等緊一個答案」；亦未曾有任何官員向家屬致歉，「始終冇人承認負責，由day one到而家」。

何小姐認為獨立審查組及勞工處有一定的責任，「真係好多人有責任嘅，但係而家就佢一路都冇講過，四個月啦，對我哋居民嚟講係一個好大困擾嚟」。她提及，不少街坊事前曾向多個部門投訴，惟獲回覆案件不成立，僅指現場未見有發生投訴相關事件，「你話邊個要負責，真係要問返政府，由政府去決定㗎，我哋都話唔到事」。

會上披露，勞工處曾16次巡查維修中的宏福苑，都未有發現工人吸煙。何小姐質疑：「點可以巡查出嚟結果同影出嚟結果唔同？」她認為除了承建商，市建局同樣責任很大，指市建局把大維修承建商「宏業建築」的項目管理評為滿分，「點解出咗事之後，市建局一句嘢都無講過？」她並提到大埔區議員黃碧嬌力及上屆法團力推宏業任承建商，直斥「佢哋而家唔承認責任，個個你要搵佢，都搵唔到啲區議員」。

對於宏業明知棚網不阻燃仍購入，何小姐表示「非常愕然」。她憶述自更換棚網後，家裡沒有開窗，處於密封狀態，她亦曾向管理處及宏業地盤辦公室投訴雜物堆放在出入路口及發現煙頭問題，惟「佢哋都冇理㗎」。


宏盛閣何小姐