戲院商會指票房較去年同期升四成 料市道已穩定
【獨媒報導】戲院業去年面臨寒冬，全港戲院總數更減至約52間。早前上映的電影《尋秦記》、《夜王》票房叫好，香港戲院商會理事長袁彥⽂表示，今年戲院票房較去年同期上升四成，形容「去年係生存唔到」：「今年叫勉強可以營運落去，叫做打個和。」被問到會否再有戲院結業，袁彥⽂指假若能維持今年首四個月情況，相信市道已穩定下來。
預告下半年片單強 指戲院數目屬穩定水平
戲院商會今午舉行「全港戲院日」記者會，袁彥⽂接受訪問時稱，對今年票房感到樂觀，因為下半年的中文、外語片片單很強，「市民會出返嚟睇電影多啲」，或因為經濟向好，串流平台訂戶數目增加、觀看時數減少：「電影始終係市民鍾意嘅社交活動，始終有好電影，加埋片單都係樂觀嘅。」
此外，袁彥⽂指現時戲院數目屬穩定水平，戲院及電影過去兩年的市道較差，令戲院出現結業潮，「過去一年大家見到穩定晒」，戲院數目將維持在50多間。他又提到，除了《尋秦記》、《夜王》票房叫好，《再見UFO》、《我們不是什麼》有一定韌力，《狸想奇兵》、《超級瑪利歐銀河大電影》及《末日聖母號》的票房同樣不俗。
指Marvel電影近年大不如前 戲院開拓其他觀影體驗
袁彥⽂認為，市民生活模式在新冠疫情後有所改變，舉例指Marvel電影在疫情前佔本港戲院票房達四分一，惟近年已大不如前，而上映的電影數目同減少，而戲院會直播更多演唱會、錄播的脫口秀，反應亦不俗。他認為戲院應有不同可能性，吸引不同年齡階層享受觀影體驗。
被問到今年會否再有戲院結業，袁彥⽂指假若能維持首四個月情況，相信市道已穩定下來：「戲院都係一門生意，過去幾年我哋係維持唔到生計，唔好話賺錢，今年好返啲，但係咪去返疫情前水平，絕對唔係。依家可以維持到日常基本開支，可能賺少少錢、打個和，成件事會穩定咗。」他估計，業界會按觀眾的口味拍適合的電影，對市況表示保守樂觀。