（獨媒報導）大埔宏福苑宏新閣中層居民今日上樓執拾，居住在14樓的盧先生早上返回住所，本身是攝影愛好者的他，在火災中損失的相機鏡頭達70萬元，包括收藏多年的Leica 鏡頭。不過，盧先生表示「相機可以買過，人冇事就得啦」。


盧先生

盧先生今早與兒子一同上樓執拾，及後乘坐穿梭巴士返回大埔墟站，持手推車下車。盧先生是攝影愛好者，已接觸攝影50多年，曾替別人拍攝婚紗照片，現時是水喉工。在今次火災中，他收藏多年的相機及鏡頭都在大火中付之一炬。

在上樓執拾期間，盧先生從灰燼中取走部分相機及設備，包括20多個鏡頭，希望「留個紀念」、「執番啲爛玻璃」。除了相機及鏡頭，菲林底片、相片及回憶亦全被燒毁。根據盧先生提供單位內的相片，相機及鏡頭均燒成灰白色。


盧先生指，家中有兩個櫃裝滿相機和鏡頭，從他提供家中的相片可見，滿地是燒得溶溶爛爛的相機部件，估計損失約60至70萬。（相片由盧先生提供）

Leica相機鏡頭盡毁 僅逗留單位一小時

盧先生向記者展示損壞的部件，苦笑指包括Leica M10及多個鏡頭「都冇晒」，又提到兩枝特別有意義的鏡頭，即「Leica APO-Telyt-R 280mm f/2.8」、「Leica 280mm f/2.8」。他坦言今次損失慘重，「淨係鏡頭都六、七十萬」，「幾廿個鏡頭，裝滿兩個櫃，擺到周圍都係」。

在執拾過程中，盧先生發現單位內所有物品包括傢具均已燒毁，只餘下爛玻璃：「個仔淨係返啲硬幣，燒唔到嘅嘢。」他最終只在單位內逗留一個多小時，苦笑指因為單位損毁嚴重，因此執拾時間足夠，「冇嘢執就走㗎啦」、「冇嘢執上去做咩啫」。他最後表示「人安全最緊要」：「有生命，你先有得玩鏡頭。」

向單位鞠躬道別 「多謝住咗咁多年」

記者問到執拾後的心情，盧先生指早已有心理準備，預計單位損毀嚴重，對家園遭火災吞噬，感到十分無奈：「有咩心情？冇心情㗎啦我哋，冇就冇㗎啦。」

盧先生已在宏福苑居住逾30年，他執拾時已向單位鞠躬道別，並想感謝屋苑：「多謝住咗咁多年，風風雨雨⋯⋯」他一度未能說下去：「冇嘢想講，頂唔順。」


盧先生提供家中的相片