【獨媒報導】居住宏盛閣14樓何小姐今早（5月3日）上樓，執拾21袋物品落樓，包括心愛的多啦A夢Lego模型、擺設、手織毛公仔以及梅艷芳CD等。事隔數月回家，她直言心情頗為激動，上樓前腦海一片空白，當望見家中燻黑牆身、被淋濕的衣服、一箱熱融的多啦A夢精品及一些被燒毀的唱片，不禁哽咽「我都唔知一間屋點解搞成咁⋯⋯我無諗過一個火災無咗間屋。」

政府已就宏福苑七幢大廈包括宏盛閣提出收購業權，何小姐不滿未舉行業主大會前，便著居民出售業權，認為十分無理，「點解唔維修俾返我哋住？」她提到不少街坊希望原址重建，亦不認為需時十年之久。「講真我哋好似變做難民咁，我哋連啲新移民不如，反而我係土生土長香港人，我有納稅嘅，但係火災點解你要收我層樓呢？我唔係好明，佢仲話要強行立法嘅時候，咁好多外來香港買樓，唔好話香港人啦，咁我買咗樓係一樣好冇保障嘅嘢，咁我買層樓嚟做乜呢？」

不認為需道別

被問到有否為屋企道別，何小姐直言「無㗎，其實我唔覺我需要道別」，指執拾時朋友提醒「斷捨離」，「我自己都有啲唔好老脾就話『你唔好學埋司長講呢啲嘢』，其實無一家可能可以做到斷捨離呢樣嘢，因為我自己住咗30年，好多街坊40幾年，真係無可能呢樣嘢」。

執拾期間不斷「提醒」剩餘時間

所有上樓居民，皆只獲3小時執拾時間，何小姐指時間不足，只取回家中三分一的物品。她形容期間被「提醒」剩餘時間，感覺被催促：「其實三個鐘頭佢不斷都話俾你聽，剩返幾多個鐘頭，咁都係趕你嘅，其實叫唔叫趕呢，我都唔係好知啦。」她指其餘物品只好留待下一轉上樓執拾，包括其餘梅艷芳的CD及卡式帶等。

何小姐珍藏各種多啦A夢精品，單位燒毁情況雖然不算嚴重，惟可能因為高溫，地板、家具及儲物箱溶在一起，大部份膠箱內物品已損壞，包括「融晒」一箱裝滿多啦A夢公仔，「其實我好多嘢喺膠箱度，諗住喺膠箱可以攞返走，咁......最終攞唔走」。