譚氏二家姐（左）、三家姐（右）

（獨媒報導）雖然當局多番表明無意原址重建，居民意見仍然兩極。曾住宏盛閣20樓的譚氏姐妹就今日上樓執捨後表示，不會選擇原址重建，因為怕「發惡夢」及難以等待十年；不過，他們就希望政府對災民「寬鬆啲、唔好咁計較」：「可能俾多啲地方揀，唔好計得咁盡，可以嘅盡量滿足佢哋，始終佢哋都係受害者，有啲傷亡都好慘㗎⋯⋯有啲人真係死咗親人，你點樣補償返啫？政府應該真係俾多啲嘢佢哋，豁達啲唔好斤斤計較」。

同日上樓執拾的廖先生就表示，其單位未受波及、完好無缺，希望能回到單位繼續居住：「離開（當刻）遺憾同埋失望，始終可能單位冇燒，即係完好無缺，咁點解唔去做返維修俾我哋入返去住呢？或者重新起過，你話等9年、10年，我覺得可以等到嘅。」

稱三小時足夠執拾 「攞完基本嘢就算」

譚氏四姊弟今早一同回宏盛閣20樓的「娘家」。三家姐表示單位情況理想，較想像中良好，只有廚房部份位置被燒毁，並成功取回媽媽的首飾、文件、相片及紀念品等。火災前該單位只剩細佬居住，他們用了一個小時多便執拾好落樓。

三家姐又指，三小時時間相當足夠，只有簡單和屋企道別，沒有特別逗留家中：「無需要啦，你坐幾耐都好都要走，所以做完基本嘢，攞完基本嘢就算」。他們亦不打算再次上樓，又稱「攞幾多都好，或者睇到啲咩都好，我覺得都係了結咗一件事，完結咗叫做」。


廖先生

單位未受波及完好無缺　嘆三小時不足以道別

宏盛閣5樓廖先生昨日已上樓，今日再幫住17樓的哥哥上樓執拾。他憶述昨日上樓一打開門，見到單位內的狀況定格於2025年11月26日：「阿哥個仔嗰啲功課仲攤咗喺枱邊準備做個moment，間房就基本上係我起要起身走啦，即係將張床都仲係咁凌亂。」

廖先生在宏福苑居住30多年，對於要被迫要走，直言感到不開心。但更可惜的是，他未有足夠時間跟屋企道別：「得嗰三個鐘，其實你想話留念影相，都可能拍一段片，已經要開始嗱嗱臨執嘢。」

對廖先生而言，在宏福苑最珍貴的回憶，莫過於落樓下做運動及踩單車，以及家中窗外的吐露港景色。廖先生坦言非常掛念屋企，稱「你圍咗網年幾都望唔到出面，而家因為大火拆咗個棚網望得返出面，咁係一個懷念嚟」，亦相信不少街坊希望選擇原址重建。


廖先生提供單位內影片截圖