李國鴻

【獨媒報導】首四輪聽證會今日（8日）告終，獨立委員會宣布將押後聆訊至6月中下旬，以等待政府專家報告，並提示各方準備結案陳詞建議，無提及「升格」成獨立調查委員會。居民涉事方之一，遺屬李國鴻表示宏業董事侯華健、鴻毅董事黃俠然、前法團主席鄧國權及民建聯大埔區議員黃碧嬌角色關鍵，惟首四輪未見他們作供感失望，嘆「你冇個（傳召）權都冇辦法叫到佢哋出嚟」。他又反駁主席陸啟康所言「冇嘢唔敢查」：「佢夠唔夠膽查黃碧嬌？你唔係個個都敢查㗎。」另有旁聽居民質疑無「升格」會放生關鍵人物，「不了了之，好大問題。」

遺屬提四關鍵人物 未作供感失望

對於委員會主席陸啟康表示「冇嘢唔敢查」，李國鴻表點名侯華健、黃俠然、鄧國權及黃碧嬌稱：「呢四個人最關鍵，佢敢查就要佢哋出嚟。陸官話乜都夠膽調查，佢夠唔夠膽查黃碧嬌？我如果有得問就一定問佢。你唔係個個都敢查㗎。」對於陸啟康表示調查進展理想，他強調始終未見上述關鍵人物，期望下一輪他們會作供，「我就覺得唔係好良好，仲有啲遺憾喺度。」

聽完四輪聽證會，感覺部門之間互相推卸責任，曾向市建局投訴的他認為局方是其中一個「最大元兇」，不滿對方大維修簽約後就無處理問題。對於調查，李先生仍觀望能否解答心中疑問，現在解答七成左右，「宏福苑好多個問號，睇佢抹唔抹得晒。」


何小姐

居民質疑無升格「不了了知」

旁聽居民何小姐就表示，聽畢陸啟康說法，理解最終沒有行使法定權力升格。她同樣關注無傳召黃碧嬌、宏業、鴻毅等關鍵人物作供，對此感到失望，認為「好大問題」。她質問：「即係不了了知呀？即係放生咗黃碧嬌嗰啲，佢哋唔出嚟作供，對我哋宏福苑居民係傷害。」何小姐又認為政府整體態度「個個話唔理想、不負責任，將個波踢嚟踢去，踢到冇雷公咁遠。點為知理想？」

居民：問責才能平息不滿

旁聽居民張女士坦言，現在「有啲好主要人物冇出嚟，梗係未夠」，包括議員、承建商，並引述特首李家超曾表示，法定獨立調查委員會程序不能簡化，因此賦權獨立委員會，有需要可行使法定權力，認為「梗係要升格」。她指在聽證會看到執法漏洞，最希望有人問責，承建商、受賄人士要負刑責，「要負責嘅人有後果，先可以平息到整個社會對而家現象嘅不滿。」

張女士表示對政府人員目前作供感到滿意，認為「相對老實」。她指聽證會解答到不少心中的疑問，她形容大維修過程累積很多疑團，聽證會慢慢揭開如同「治療」：「當初好多唔明白，個創傷係好大，而家一路一路每日話俾我哋知，更多細節。我死都希望死得明明白白，唔好死咗都唔知咩事。」

宏福苑火災獨立委員會 聽證會｜第二十四日
民政總署：合安工作艱鉅 成功「爭取」豁免宏志閣電費
聽證會首四輪「事實證人」告終 6月下旬傳專家 陸啟康未提升格委員會
年初退休免受首長責任制追溯 ICU總監否認失責 稱制度問題 「因大火先突顯」
獨立委員會未提升格 旁聽居民：不了了之、唔係個個都敢查

宏福苑火災獨立委員會 聽證會｜第二十三日
ICU睇宏昌宏志樓梯照片無察覺違規生口 容兆倫稱以為臨時遮住破窗
ICU大火後致函屋宇署控訴從未通知最新工地巡查要求
ICU小型工程小組僅負責開工前完工後審查 中途依賴專業人士「自我監督」

版權: 
禁止衍生