【獨媒報導】本地甲組聯賽進入尾二輪賽事，至尊以6：3擊敗浩運，提早一輪奪得冠軍。今場梅開二度的至尊班主兼球員王至尊表示，已與目前港甲第9位的地區球隊沙田達成共識，來季將合作升班港超聯，惟目前有待足總批准。王至尊表明，球隊方針為使用年輕華人球員作班底，並由盧均宜出任主教練：「我哋目標係好明確，想出一個新嘅林嘉緯，新嘅盧均宜，而唔係出一隊10個鬼佬喺度，乒鈴嘭唥喺度踢有咩意思？」

公民去屆贏得甲組聯賽冠軍，王至尊以班主身份奪冠，至尊則以乙組聯賽亞軍升班到甲組，王至尊今季改為帶領「正室」至尊，陣中多名球員擁有港超聯經驗，包括盧均宜、林嘉緯、林學曦及陳文輝等。

林學曦連中三元 王至尊賽後派錢

在開前，主教練林嘉緯講解戰術部署，「入多啲波，早啲開記錄」，有球員笑言「贏夠10球，獎金double」。不過，今場比賽形勢一面倒，至尊力壓浩運狂攻，球隊班主王至尊今場以左翼姿態上場，並出任隊長，其中林學曦上半場已連中三元。

此外，盧均宜上半場射入一球，下半場更助攻予王至尊，後者第一時間門前撞入，浩運下半場一度連追兩球，王至尊在比賽末段射近柱，再次擴大比分，浩運完場前再下一城，將比分改寫成6：3。在頒獎及及慶祝後，王至尊即場派發現金作獎勵，並大叫：「最緊要乜嘢？獎金！」

王至尊：都叫做半個衛冕冠軍 欣賞亞軍和富社企

王至尊在比賽後接受傳媒訪問，對贏得冠軍感到高興，「都叫做半個衛冕冠軍」，但指今個球季較辛苦，球隊積分較去季公民多，失球較去季少，而且排次名的和富社企實力強橫，「想俾啲respect和富社企」。《獨媒》問到派發的獎金金額，王至尊稱季前已承諾為20萬元，雖然較去季少，但人腳較強。

據了解，沙田體育會足球會推行主任陳漢英今年3月已入信足總表達升班意向，即由至尊作冠名，至尊原本的甲組會籍則復名天旭。《獨媒》關注升班的具體情況，王至尊稱球隊已與沙田達成共識，自言對在沙田出生，以讀小學及中學的人來說，「呢個係一個好開心嘅圓夢」。他坦言投資港超聯是「勞民傷財」，惟要投資的話希望選擇自己的社區：「希望係俾華人踢波，希望係幫社區或者香港做啲嘢！」

望透過演唱會工作背景 吸引球迷入場

本身是國際娛樂機構 Live Nation Electronic Asia 老闆的王至尊，他續提到，希望利用其從事演唱會或娛樂公司的工作背景，以吸引球迷入場，「球會無球迷，你乜嘢都唔係」。他認為香港球迷坐爆啟德體育園主場館支持港隊，可見十分喜歡足球，「但你都要俾個理由支持佢」：「呢個係令到我出盡全力，令球迷入場嘅原因。」

《獨媒》追問具體進度，王至尊稱「球員就簽晒」，但表示假若以沙田的名義升班，則需要「走流程」，表明會尊重足總，待議決後再作定奪。《獨媒》關注若然沙田未能升班，「至尊仲升唔升」，王至尊表示要「深切討論」，強調自己「唔會縮」：「上網點樣鬧我、講我，話我慳錢都好，乜都好。其實我係有睇嘅，我好樂意去聽。證明有人鬧你，有人關注你，對你有期望。」

如未獲足總開綠燈？ 王至尊：我會另外搵方法

王至尊補充說，假如要在比賽日舉辦嘉年華，邀請歌手唱歌及DJ打碟等，亦需要主場球場，「對我嚟講呢個係其中不可或缺嘅因素」。不過，他表示如果足總認為，沙田不符合升班港超聯資格，「我會另外搵方法」、「我唔會直接放棄」。

此外，王至尊提到，由至尊在去年12月排在甲組聯賽榜首的時候，已花了不少氣力籌備升班港超聯。他認為與地區合作並不是一拍即合，因為涉及多個政府部門及程序，「淨係傾沙田都用咗三、四個月時間」、「尊重囉程序係咁」。

班費800至900萬 呼籲外界留意球隊年輕球員

《獨媒》又問到來季預計班費及陣容，王至尊稱約500至700萬元，連同區隊的資金約800至900萬元。他表明，球隊方針為使用年輕華人球員作班底：「對我嚟講，我俾錢外援踢，對香港足球係毫無意義。我冠軍對我嚟講係一件事，但幫到香港足球係另一件事。又話我慳錢，但當你哋見到我簽嗰班靚仔嘅時候，你就唔會覺得我係濫竽充數。」

他稱球隊領導層曾討論，那些年輕球員具有條件、能力晉身港隊，「我哋先至會嘗試去栽培佢」，惟現時先賣關子，呼籲外界屆時留意球隊的年輕球員：「我哋目標係好明確，想出一個新嘅林嘉緯，新嘅盧均宜，而唔係出一隊10個鬼佬喺度，乒鈴嘭唥喺度踢有咩意思？」

已簽6名外援 盧均宜、林嘉緯任主教練及助教

王至尊透露已有24名球員，其中6名為外援包括今季球員馬文、效力公民的朴叡俊，惟笑言自己會以最低工資簽約：「外援唔會再多，香港球員踢香港波。」除此之外，盧均宜、林嘉緯將分別出任主教練及助教，「我嘅角色就係一個球員」，並負責市場推廣。

對於有傳邀請前韓國國腳、敗走傑志的金信煜復出，王至尊稱只是戲言，但承認曾向對方了解意向，但對方意願不大，「我有搵過伊高，有搵過丹恩，但呢啲都唔會踢㗎啦，我哋需要gimmick呀嘛，如果金生嚟踢就好過癮啦，對傑志嘅話。」至於另外4名外援，王至尊指他們均未在港超聯球隊效力：「搵咗啲比較高質少少，因為你搭住班香港𡃁仔外援，點都一定要有返啲質素。」

已提出翻新沙田運動場 王至尊：至尊件波衫周街都有人着住

此外，王至尊指已提出翻新沙田運動場，但不肯定在新球季前能否完成翻新工程：「我希望成個沙田區都見到我哋嘅區旗、隊旗、球員同教練，你周圍都見到佢哋嘅，至尊件波衫周街都有人着住。」

有記者問會否效法東區今季的嘉年華模式，王至尊稱對方已經做得很好，但自己擁有娛樂公司的背景，希望辦得更好：「大家知我做Live Nation，如果出到嚟嘅話，拉唔高兩三級，個球會係毫無意義。」

笑言不排除送BTS演唱會門票 吸引球迷入場

王至尊希望能提高入場人數，笑言不排除送出韓國男子組合防彈少年團（BTS）的演唱會門票，並會安排在沙田長大、居住的明星到場支持，「我哋每場都有一個，大家估吓啦」。他表示有人質疑，沙田排名第九同樣能升班，「咁你攞個冠軍嚟做乜嘢」：「我覺得型囉！你唔好理我，沙田至尊就係我做管理層，我孭飛。」

早前有報道指歌手JW王灝兒與王至尊為情侶關係，她今日亦有到場，連續兩年現場慶祝奪冠，亦不避嫌與對方合照。

版權: 
禁止衍生