【獨媒報導】合安管理有限公司獲委任為大埔宏福苑法團管理人，昨（12日）舉行首場簡介會，今日上樓執拾的宏志閣居民冼小姐斥合安以網上形式舉行簡介會是逃避居民，批評合安有如單方面發表工作報告，「佢應該代表我哋業主㗎嘛」。被問到如何評價合安對居民的態度，冼妹妹表示：「好好，太好喇，適合做政府官員。我信政府㗎！政府幫我哋㗎嘛！」

質疑合安逃避居民 選擇性回答提問

合安事前稱會回答居民問題，冼家兩姊妹欲查詢宏志閣是否獲火險賠償、召開業主大會的情況，以及想要求取得宏福苑八幢大廈結構評估報告，惟合安只選部份提問回應，冼小姐一家在網上會議裡不斷舉手仍未獲選中，會後亦知有不少街坊同樣未獲回應，批評合安選擇性回答部分居民提問：「唔使面對面接觸我哋，陰謀論嚟講，佢可以揀啲問題嚟答。」

作為姐姐的冼小姐續炮轟簡介會內容片面，「依家係佢有乜嘢就講畀我哋聽，我就只可以接受。佢有冇收到我哋想要嘅資訊？就冇囉。我哋想發表所有嘢，佢應該代表我哋業主㗎嘛。」她又關注宏志閣在大火中未有受災，「我哋消防設施有咩要維修呢」。妹妹則批評合安以「語言藝術」令人意識到合安不會應居民要求召開業主大會。她另指合安指示居民上網閱覽文件和通告，惟有長者不諳使用網絡，希望合安能寄紙本給居民。

對於長遠居住安排，冼姐姐表明想繼續居住在宏志閣的單位：「點解我哋突然之間要好似走難咁，清晒屋企啲嘢，然後又搬去一個陌生嘅環境？」她認為政府的樓換樓方案「聲稱好好」，但自己自 1 歲開始居於宏福苑，只願回宏志閣生活：「點解又要再去畀一筆錢投入新嘅環境？始終我哋屋企真係冇影響，水電又冇事， 𨋢又冇影響，屋企人真係住得太耐。」

冼妹妹則表示，理解有居民想搬走而想賣業權，但就其與鄰居聯絡所知，就不相信有77%業主想出售業權：「我絕對唔係（77%之內）！我可以好肯定咁講！我間屋無燒，點解要賣？我唔明呢一樣嘢。同埋你可以復修嘛，我唔係要你重建⋯⋯咁我唔知政府會唔會睇錯數字呀，你知啦卓（副）司長咁叻計數。」

她強調不會阻止街坊出售業權，但認為當局應兼顧希望留下的居民意願，「有啲人想留低，你唔可以抹殺想留低嘅人，我堅持留低嘅。」

母親激動落淚 鄰居大火中死亡傷感

冼女士的母親接受訪問時更激動落淚，「幾廿歲人搞啲咁嘅嘢，我都想喺度生喺度死㗎嘛⋯⋯點知依家要分開晒，朋友又死埋，咁有咩好啫？嗰陣時大家約埋一齊去旅行㗎嘛，依家都無晒囉，我就嚟崩潰同黐線。」

版權: 
禁止衍生