司徒太太

【獨媒報導】宏福苑宏志閣居民連續第二日上樓執拾，居住中層的司徒太太不滿政府安置方案朝令夕改，指原已決定向當局出售業權，惟合安管理有限公司日前舉行的簡介會，卻提出宏志閣業主可選擇支付3,000萬維修費以搬回住所，並批評該方案嚴重不公：「我哋用錢去裝修，跟住你又冇問過我哋意見，跟住就拆晒個棚，拆完之後依家又話，你返去住，後尾又要你哋俾錢裝修⋯⋯埋單就要我哋去埋單。」她稱現時居民非常被動，只能見步行步，無法作出任何決定，更一度哽咽說：「每一日都唔同，每一日係唔同，我哋係決定唔到。」


司徒先生

第二次上樓 「有咩執咩」

司徒先生一家居住在宏志閣中層單位，他與太太第二次上樓，指由於上次上樓時暫住酒店，沒有地方放置物品，今次已決定「有咩執咩嘢囉」。

政府早前宣布，宏志閣若有有不少於75%業主簽署賣業權，將會納入收購方案，司徒先生認為「梗係有人鍾意有人唔鍾意」、「冇辦法㗎」：「其實我哋咩都唔想理，最好政府決定咗咩方案，我哋諗咩方案就算㗎啦⋯⋯2,000伙人梗係有人（覺得政府安排）好、有人唔好㗎啦。」

質疑政策朝令夕改 居民無所適從

司徒太太原本對出售業權沒有特別想法，但就認為政府的方案朝令夕改，令居民無所適從。然而，她最憤怒的是，合安在簡介會提出，宏志閣業主可以選擇付3,000萬維修費搬回住所方案嚴重不公：「我哋用錢去裝修，跟住你又冇問過我哋意見，跟住就拆晒個棚，拆完之後依家又話，你返去住，後尾又要你哋俾錢裝修。」

她續提到，當局未有就「樓換樓」方案提供詳細資料，包括揀樓抽籤次數、如何安置未能覓合適居所的居民等。她不諱言，原本已決定出售業權，如今卻另有選擇方案：「你之前話燒成咁，梗係配合政府啦想賣啦，快啲大家上樓，因為大家真係好辛苦㗎，好啦，你一陣話咁樣，一陣又話咁樣我哋真係無所適從。」

哽咽說方案每日不同 指不少居民均希望業主大會

除此之外，司徒太太不滿，合安未有詳細解說往後的管理費等問題，慨嘆居民只能見步行步。說到這裡，她不禁悲從中來，對此感到無奈，並向記者哽咽道：「每一日都唔同，每一日係唔同，我哋係決定唔到。」

被問到是否希望返回宏福苑居住，司徒太太則坦言「個問題實在太大」：「係想嘅，始終喺宏福苑咁耐，我喺度結婚生仔，咁係有感情嘅，但係依家你搞到咁樣，唔知⋯⋯真係唔知。」

對於舉行業主大會，司徒太太稱據其了解，不少居民都想參與，指大火前曾多次出席會議討論大維修，惟每一次均「鬧交收場」，「居民都話好被動，你哋話要整，咁我哋咪要整。」

炮轟合安單向報告 冀了解每幢大樓結構狀況

司徒太太再次炮轟，合安在簡介會不設問答環節，只單向地向居民報告，「變咗我哋心中好多疑問係問唔到」。她強調非常希望舉行業主大會，原因是希望知道每幢大樓的結構狀況，例如是否屬於危樓：「唔係話你要維修3,000萬，跟住9個月之後你就可以上樓，咁之後呢？好多疑問都要逐一要好清楚，因為而家買樓唔係買棵菜，你香港地最難係咩嘢，係層樓呀嘛。」

在大埔區內居住多年，司徒太太指宏福苑居民已習慣上班上學的出入方式：「你畀我揀個啲真係幾難，又要適應啦，同埋交通唔同咗，你話價錢方面就一般啦，冇得講因為40幾年樓，冇得 fight。」

然而，最令其感到反感的是，合安未有諮詢居民意願，僅稱由於要進行監察便要拆棚。司徒太太質疑「先前又冇同我哋講，埋單就要我哋去埋單」。她最後重申，原已打算配合政府出售業權，合安在周二的簡介會卻表示可以維修，「咁你真係叫我點？」

版權: 
禁止衍生