陳先生

【獨媒報導】有宏福苑業主早前遞交聯署，要求法團管理人合安舉行業主大會，合安回覆稱要仔細核對業主法定簽名包括查冊，及比對現有業主房屋檔案中的簽名樣本，已入稟向土地審裁處申請延長時限。宏志閣居民陳先生狠批「黐線啦」，指合安做法只是拖延時間，質疑「合安根本就係企喺政府嗰邊」：「因為佢唔想阻礙政府收購工作，一開會可能好多人反映我哋唔接受收購要原址重建，咁政府就好難做。」

居民盼開業主大會發聲　嘆「我哋嘅聲音冇人聽」

宏志閣在大火中未有受災，居民今日繼續上樓執拾。然而，焦點仍落在合安日前入稟土地審裁處，申請延長時限，稱要仔細核實簽署，包括查冊、比對現有業主房屋檔案中的簽名樣本，及要求簽署人出示香港身份證，說法令居民感到譁然。

宏志閣居民陳先生強調，業主大會是讓業主發表意見，現在卻無法召開，認為「我哋嘅聲音冇人聽，就算有人反映都唔係主流嘅媒體，依家政府都係唔聽」。他不滿合安入稟延期舉行業主大會，認為是拖延時間：「因為佢唔想阻礙政府收購工作，一開會可能好多人反映我哋唔接受收購要原址重建，咁政府就好難做。」

斥政府「做錯嘢」 致居民死亡

他更狠批「黐線啦」，質疑「合安根本就係企喺政府嗰邊」：「我40年前買樓嘅簽名點樣對呀？（以前）我喺宏福苑開會使唔使對簽名呀？根本唔需要對簽名，對身份最緊要，你有心做嘅，你過嚟我度對一對身份，『呢個我簽嘅』就搞掂啦。」

此外，陳先生不諱言居民有怒氣，「講真個個都好嬲」，斥政府「做錯嘢」，大維修前已有各樣問題出現，各部門卻未有跟進，導致168名居民死亡：「聽證會個個都話唔關我事，又話制度問題，因為呢啲咁嘅問題先令到有呢場火災」。

不滿合安未為居民追討大維修保險賠償

對於合安提出居民欲返回宏志閣居住，或須支付3,000萬元維修費。陳先生就稱「假嘅」，指大廈內至多需要更換水缸及消防系統：「其實本身我哋整好晒㗎嘛，差少少外牆嗰度未鋪紙皮石，你何來要咁多錢呢？」。

陳先生續指，合安不但未有為居民追討大維修的保險賠償，亦未交代詳情：「係咪因為火燭，令到我哋有咁嘅情況維修唔到，係火險會賠㗎嘛！我哋應該有份攞個賠償金去做個維修，但係政府合安唔承諾呢樣嘢，都係想逼我哋走。」

對於長遠安置方案，陳先生只想遷回宏志閣的單位，指宏福苑交通方便，而且環境優越，加上單位間隔實用，惟政府卻早有定案，居民沒有其他選擇。他又提到，政府農曆新年前發出的安置問卷，原本涵蓋選址廣福公園作原區重置，「最後拍板直頭就係冇嘅」。

對選址頌雅路西不收貨 質疑特區以最便捷方法向中央交差

在接受訪問期間，陳先生再三強調，政府「做錯嘢」導致宏福苑多名居民離世：「其實佢係咪應該要有個責任呢？佢收咗我哋樓，可能10年、8年就賣返出去，咁點解唔喺隔離廣福公園嗰度起樓俾我哋。」

對於當局已在區內選址頌雅路西，興建居屋安置宏福苑居民。陳先生亦表明「不收貨」，因為頌雅路西是區內僅餘的唯一安置選項，加上地方偏僻，出入較宏福苑須額外花20分鐘。他指出，本港1953年發生石硤尾邨大火，港英政府在災後亦是原址重建，特區政府現時卻只選擇最便捷方法，向中央「交差」。

政府昨日已起向宏福苑業主發「收購建議信件」，宏志閣假如在6月30日前，獲75%業主同意出售業權，正式確認其向當局出售業權的意向，長遠方案便會正式開放予宏志閣，若6月30日後簽署則會在第二輪揀樓。陳先生就慨嘆，居民只能無奈接受：「政府話事囉，佢話收購咪收購，都冇辦法，我哋都冇嘢可以做得到」。

版權: 
禁止衍生