Lulu一家人與父親合照

（獨媒報導）前日（17日）是宏志閣居民次輪上樓的最後一日。回到毫髮無損的家，卻「有家歸不得」，連日來一戶又一戶居民對著鏡頭訴說不捨與無奈。有一致不願出售業權家庭向《獨媒》表示，決定背後包含父親遺願：「間屋係祖業，唔賣，點都唔賣，多多錢都唔賣。」Lulu（化名）的父母是宏志閣一手住戶，早出晚歸工作供樓養家。多年來原來很多地產代理會詢問他們，是否願意放售這個海景單位，但父親堅拒，甚至不過問地產代理報價，近70歲的母親指「佢唔係為錢，呢間屋係我哋辛辛苦苦」。

子女結婚相繼搬離、丈夫去世後，Lulu母親獨居於宏志閣，現在安置於過渡性房屋，她坦言適應不易，搭車都會預設大埔為目的地：「有時喺出面，我都成日search咗大埔嘅路線，忘記咗我已經搬咗去出面。」她慨嘆宏志閣一旦拆卸，等待安置以年計是煎熬：「希望有關嘅人體諒我哋嘅心情，我哋除咗不捨幾十年嘅情誼，仲有而家咁樣折騰，憐憫我哋唔好俾我哋再受折騰。」她唯一心願是回到熟悉的家，「我喺度住咗咁耐，梗係唔想賣業權啦，我真係好想返去住，我真係好想好想返去住呀。」


Lulu母親

「我好嬲佢咁樣處理宏志，係勁嬲」

Lulu和哥哥在宏志閣出生長大直至結婚，Lulu幼稚園到中學都在大埔區就讀，幾年前結婚搬走。

第一次見Lulu，是上個月七座受波及大廈第一次上樓時。那次她幫宏建閣朋友收拾，匆匆走過。那天是4月29日，是政府首次公布，宏志閣四分三業主同意就會納入收購的翌日，Lulu當時留下了一句「我好嬲佢咁樣處理宏志，係勁嬲。」

5月17日是Lulu一家第二次返回宏志閣，記者相約她和母親、丈夫在廣福邨平台坐下受訪，她的怒氣沒有消退，重提當天情況，她說不相信政府所言有77%業主希望納入長遠安置，批評根本沒有實質數據「齋噏」：「個個街坊訪問都話我唔想賣，有啲見慣見熟街坊都話唔想賣」。她說有些街坊說賣樓，心態是出於「個個都話賣」。


Lulu和哥哥童年時合照

父母早出晚歸 建立兄妹安樂窩

這個家的意義，源自父母的心血。Lulu先父是一手業主，她形容當初父母「死慳死抵」供樓養家，一手一腳建立安樂窩，父親天未光就出門、母親深夜仍在公司，「夜麻麻返到嚟，攰到攤喺梳化可以秒睡」。她指「老一輩為咗個家，為咗啲仔女，為咗將來養老，好辛苦咁供斷咗層樓。」

同時間，由於小時候父母早出晚歸，她說「（同間屋）分分鐘仲親過阿爸阿媽」：「阿爸阿媽返工嘅時候，係呢間屋陪住我，佢都係我親人。要逼我賣業權，其實等於屋企人過身要火化撳嗰粒掣一樣，好難亦唔會做到。」她指金錢並非萬能：「錢買唔買到回憶同感情？唔係畀錢打發我哋走就得㗎。」

一旁的母親就說，昔日住在寮屋，有山泥傾瀉危險，之後幸運抽到宏福苑，子女出生後，「我哋守住呢度，直情當祖屋」。

Lulu哥哥說，宏志閣的意義就是「屋企」二字，他提起火災後太太想送花給奶奶做生日禮物，檢查花店送貨範圍，哥哥不加思索表示「大埔一定會送」，太太提醒後他才記起，這個家已經回不去。

哥哥又說，這麼多年來，每次搭巴士回家，一去到廣福邨轉彎位，車上「個個都醒，瞓覺都冇用。」這種對社區的熟悉，是經過多年紮根：「問題係我咁多年都住大埔，只要喺香港衣食住行都幾乎喺大埔，即係要將我成個人連根拔起？如果冇得返宏福苑住，我都唔知用咩心情返大埔。」


（資料圖片）

代理多番覬覦 父親堅拒賣樓

有一段時間，Lulu一家與嫲嫲三代同堂住在宏志閣。幾年前父親去世，媽媽獨居於宏志閣。

災後如何處理業權，成為不少家庭要討論的話題。Lulu說不賣樓是父親的遺願，「間屋係祖業，唔賣，點都唔賣，多多錢都唔賣。」兩兄妹曾經和媽媽商量，一家一致決定不賣業權。她說未結婚前，父親曾向她和哥哥表示，就算結婚後，「屋企嘅大門永遠為你而開」，宏志閣象徵著他們的家和庇蔭，慨嘆現在如家園要「俾人搶咗，夾硬要攞走。」

一旁的母親就透露，原來以前很多地產代理詢問他們是否出售這個海景單位，但丈夫生前堅持不賣樓，甚至不過問地產代理報價，「佢唔係為錢，呢間屋我哋辛辛苦苦」。不過她說丈夫前幾年看到樓價上升，單位價值600萬，「佢自己個心就開心，我哋間屋咁值錢，但佢唔會心動話賣。」她憶述丈夫小至電掣都「好好心機去保護佢」，也常常提醒家人為避免拖板電路負荷過重，造成火警。


Lulu家窗外風景（受訪者提供）

母親安置過渡屋 地圖仍搜大埔

Lulu的母親現安置在其他地區過渡性房屋，她說居住宏福苑幾十年，要適應不容易，常常搭地鐵時都會想回大埔，「有時喺出面，我都成日search咗大埔嘅路線，忘記咗我已經搬咗去出面。譬如你約我去邊，我諗住要搭咩車呢？就search咗大埔」。

母親說，每個月都會回宏福苑，「好想返嚟同埋行吓附近啲地方，有啲懷念。」她指「我喺度住咗咁耐，梗係唔想賣業權啦，我真係好想返去住，我真係好想好想返去住呀」。

母親回憶，在宏福苑的珍貴回憶是與丈夫在公園散步、與街坊閒聊，她慨嘆現在「唔見咗啲街坊已經好唔開心；隔離因為燒咗拆咗我都唔開心；但係而家連我哋祖屋佢都話要拆埋，即係依個變為平地。」


宏福苑火災三個月後，仍有人到場獻花。（資料圖片）

「唔想政府以為買業權係好好嘅恩恤」

除了在宏福苑滿佈回憶，另一方面，母親亦提到收購價既不足以購買心儀的單位，選址也不理想，難以想像要在過渡性房屋等待：「面臨喺過渡性房屋繼續去等，等完又唔知抽唔抽到屋，等唔到可能又要等多幾年比個綠表資格我再買其他居屋。」她說很多長者沒有子女幫助，對業權的法律程序一竅不通，已有很多憂慮，「唔想政府以為咁樣買我哋業權係一個好好嘅恩恤。」

她慨嘆倘被迫出售業權，要等待安置，是再一次煎熬，渴望能回家中居住，「再要我哋去頻撲，其實對我哋長者嚟講根本係一個折磨嚟，而家我哋已經係一個好大嘅折磨。如果真係為著我哋嘅，不如好好哋整返好我哋嘅地方，我哋安心咁等佢維修好返去住。」


宏志閣

宏建閣僅1單位受損 質問日後火燭是否一視同仁

Lulu不滿合安所指用目測檢視宏志閣情況，得出復修要3,000萬元，質疑「宏志點目測到受損好嚴重要3,000萬維修？」與不少街坊一樣，Lulu不解為何政府寧願用10億元收購一棟業權，都沒有提及承擔宏志閣涉及的3,000萬復修費，「如果3,000萬可以維修到棟大廈，點解唔維修？要用10億收購業權。」

哥哥則認為，倘拆卸宏志閣，除了要用公帑收購，亦牽涉居屋供應的公眾問題，「當中涉及一大筆錢同居屋單位，公眾絕對有知情權」，他指政府有義務向市民解說宏志閣目前情況：「爲何被收購會成爲一個選項？即係完全冇受大火波及嘅宏志閣不宜居？所有數據來源都應該有清晰報告。」

除了宏志閣，Lulu亦希望曾經幫忙收拾、僅1個單位較嚴重損害的宏建閣可保留，讓希望回遷的街坊多個選擇。她指上次上樓所見，「其實換咗道門，清潔晒裡面就應該住得」。「宏建閣燒咗1個單位就話要拆，我會覺得佢唔make sense。尋日樂華北邨火燭燒咗個單位，我個反應就問，咁佢係咪都要拆呀？邊個火燭咪邊個拆囉，係咪咁玩？」


宏福苑業主簡介會（資料圖片）

新法團盼到合安 嘆業主大會無期「仲要拉要鎖」

另一樣宏福苑居民盼了又盼的，是召開業主大會，合安申請延期，傳來的消息卻是聯署發起人江祥發因詐騙百分百貸款被捕。Lulu災後一直希望可以開業主大會，去年12月新法團主席徐滿柑曾打算召開法團管委會，後以場地問題取消。Lulu說那時候「已經買定凳仔，佢話7點半開，我已經打算3點就喺門口排隊。」她認為街坊只有簡單心願，「只係諗住睇吓自己間屋可以點樣處理。」

Lulu續指在居民受訪片段可見，「宏福苑居民個個都好高質素，你有冇聽過咁耐以嚟，有街坊喺傳媒面前講粗口？」她慨嘆「點解大家咁心平氣和，淨係跟法例要開業主大會要諸多阻難？仲要拉要鎖？名目當然唔係因為呢樣嘢，但係你喺咁啱時間就拉咗嗰個人......（當然）我唔係咁樣諗政府嘅。」是否擔心江被捕會令開會更渺茫？Lulu母親就只是無奈道：「佢開唔開我都冇得阻攔」。

哥哥指合安本身由政府指派，沒有得到業主授權做代表。他不滿至今僅召開Zoom簡介會，過程如「一言堂」，「問問題嘅人冇名冇姓冇樣睇，仲要答完之後冇機會追問」。他形容簡介會與過往的法團會議相比，「更加係黑箱唔透明」。


宏志閣第二輪上樓首日（資料圖片）

盼歷史紀錄政府德政 「香港係病咗唔係死咗」

兩母女在上樓前向記者說了很多，由家的意義談到對災後安排的種種不忿，中途又苦笑說忘記了要說什麼，聽得出她們受訪前落力預備。訪問後Lulu傳來訊息，說今天不在場的哥哥也希望作補充，原以為只是WhatsApp訊息作回覆，他卻在當晚發送了2,000字的Word檔給記者。一家人用盡力，無非為了讓聲音被聽見，報導以三人的說話作結。

Lulu說宏福苑會被歷史記載，「呢件事將來一定會寫落歷史，我期望寫嘅係香港政府嘅德政，而唔係俾人鬧。我期望香港係病咗，而唔係死咗。」

哥哥質問：「與其問點解唔願意出售業權，不如問我願意出售業權嘅理由，而我嘅答案係完全冇。我愛我屋企，我屋企又冇事，咁點解唔可以返去？宏志間屋係完全住得！唔需要你重建！」

母親則希望災民得到多一份體諒，「希望有關嘅人體諒我哋嘅心情，我哋除咗不捨幾十年嘅情誼，仲有而家咁樣嘅折騰，憐憫我哋，唔好畀我哋再受呢折騰。」