【獨媒報導】宏福苑七幢大廈居民今日起第二次分批上樓執拾，居住宏仁閣低層的倫先生單位未受大火波及，不過已決定無奈選擇出售業權：「當然要買啦，我點同佢𦧲地啫，冇得𦧲㗎嘛。」他認為即使不捨亦要選擇出售：「都冇計啦，去到你唔捨得都要捨得，當然被動啦，我又冇嘢可以做，講又冇嘢好講。」對於政府提供的「樓換樓」方案，他就坦言「煮到嚟我要食，冇辦法㗎啦，一來我幾廿歲，我冇時間同佢磨」。他強調不會不滿意方案：「都唔輪到我哋講，仲有咩嘢好講啫都冇㗎啦。」

一手購入單位的倫先生上次已取走心愛的音響，今日帶同紙箱回家執拾難以購回的唱片，稱「盡量執，執到幾多得幾多」。他指今次心情較上次好，「最主要嘅嘢已經執咗啦，我個心理已經安樂咗」，故未必會再上樓。


凌女士

宏新居民讚政府方案有選擇 未考慮出席業主大會

宏新閣802室居民凌女士同樣接受政府收購方案，她認為價錢合理，亦可選擇「樓換樓」揀選居屋：「變咗可以我哋有個選擇，對我覺得係，可能每個人睇法唔同。」她首選是啟德啟陽苑，其次是大埔區內的單位，但指始終最後抽籤決定，「可能啲單位我唔啱嘅，我後尾都可以攞錢，所以變咗都OK嘅，唔係話一定錢或者屋」。

對於合安退還大維修費，凌女士坦言不清楚計法，但稱「實際點樣計法我哋都會接受，根本佢內面運作我唔清楚」，又認為合安舉行簡介會安排不錯，有提供居民發問環節：「每個人有自己嘅問題，咁但係佢都滿足咗有問題嗰啲（居民）都會解答」。被問到會否希望舉行業主大會，凌女士指即使舉行亦未必會出席，認為暫時安排沒有問題，除非之後再有問題發表或提出，才會考慮出席大會。

提到宏志閣須有75%業主同意出售業權，方可納入長遠居住安排方案。凌女士指自己有朋友居住宏志閣亦想出售業權，並引述朋友意見指：「因為呢間屋始終呢要維修，即係已經舊到要需要大維修，如果收購咗俾政府，佢亦都有個選擇可以去新嘅居屋。」

她又表示，初時自己亦希望原址重建，但認為步驟繁複且等待時間過長，直言「要咁多年之後，係有啲真係唔實際嘅，始終好難即係冇一個居所，你租呀始終感覺唔同，同自己屋唔同」。


羅先生

居民兒子指政府否決「原址重建」不尊重民意

另外，媽媽居住宏仁閣的羅先生，指媽媽打算出售業權，但認為政府方案不算完善：「樣樣嘢都好似好求其咁樣，又冇聽取民意，完全好似係自把自為，將個錯誤繼續延續落去，冇去諗過自己犯咗咩錯誤。」他指由大維修圍標至施工期間完全沒有監管，令人感到非常荒謬及憤怒，舉例如政府繼續允許授權書做法，是將錯誤繼續延續，「授權書根本上係代表咗小撮人佢哋嘅利益，罔顧大眾嘅權利，係一個錯誤嘅開始」。

他認為，政府一口否決居民原址重建的意願，「呢個已經係最大唔尊重民意嘅地方」，明白街坊對宏福苑感情深厚，故非常支持街坊選擇原址重建，惟嘆「可惜冇咗呢個（選擇），完全俾政府推翻咗。」

版權: 
禁止衍生