【獨媒報導】宏福苑七橦受災居民，今日是第二輪第三日上樓執拾，住在宏泰閣高層的莊女士再次上樓，她慶幸單位未被大火波及，今次上樓將執拾餘下物品並拍照留念。莊女士向記者稱，希望可以開業主大會，又相信很多居民都希望原址重建，唯明言知道屬「幻想」，「我哋就最想開居民大會，好多人都希望原址重建，但我哋知道呢個係幻想嚟，應該冇機會。」

她希望政府提供讓居民返回原址的選擇，「如果可以起兩三座，有啲人想番嚟住咪番嚟住囉，有啲人想走咪走囉，但佢哋都冇呢個選擇比我哋，咁我哋都冇辦法囉。」

上樓執拾 拍照懷緬

莊女士首次上樓時，已取回大部分重要物品，今次上樓將執拾餘下物品，「攞番啲冇咁重要嘅嘢，最重要嗰啲相簿嗰啲已經拎晒，仲有少少嘢想上執攞多次。」宏泰閣是損毀最嚴重的大廈之一，但她的單位未被波及，情況良好，「間屋個情況好好，都冇事，完全冇燒到、冇熏黑，地下又冇水，只不過係有啲塵啫。」她表示今次心情相對不太緊張，「今次就知道要帶啲咩，冇咁緊張，同埋睇到間屋係點樣 。」

莊女士於宏福苑居住42年，是子女成長的地方，她感謝單位成為了他們多年來的家，「牆上面寫咗屋企個number，想多謝佢，心裡面多謝佢，比我哋喺到咁多年，佢係一個家。」她希望在單位拍照留念， 「喺間屋出面影張相，影屋企出面嘅景嘅相，因為成日都望到，可以懷緬下。」

盼開業主大會 感原址重建不可能

被問到宏福苑的業權安排，莊女士向記者稱，希望可以開業主大會，又相信很多居民都希望原址重建，「業主大會有機會，但原址重建睇佢個樣都唔肯㗎啦。」

她坦言，現時別無他選，唯有出售業權，「個業權你唔賣都唔得，你唔賣都係冇㗎啦，都冇辦法㗎啦，我哋冇得選擇呀。正一係，咁唯有話自己唔好彩啦。」她已收到收購建議信，但指無暇兼顧處理，打算最後一刻才決定，「我睇都費時睇，我諗住最last嗰時先至諗，因為咁多嘢，你真係處理唔到」，「封信係掛號寄嚟嘅，好似驚死你唔要咁。」「即係啲人咁多人做錯咗咁多嘢，唔肯做好自己嘅本分，呢個又唔理想嗰個又唔理想，咁又搞成咁，咁都冇辦法。」