【獨媒報導】居住宏盛閣的洪女士今日第二次上樓，她離開宏福苑時向記者控訴，居民聲音一直被無視。即使居民在大維修初期已發現問題，但仍無法阻止悲劇發生。直至現在災後善後以及安置安排等，意見仍然不被採納。「由大維修、大圍標去到依家，冇一樣嘢係有得我哋say嘅地方。」

洪女士明言難以放下事件，「我哋當初唔係冇做任何嘢，我哋有行出嚟，我哋喺維修嘅過程有發現問題，有搵過相關嘅部門，只不過就冇一個（部門）正視呢個問題嘅出現，先至搞到一夜之間幾千個人無家可歸，百幾條人命，真係好難放低！」

「霎時之間叫我哋放低，唔係賣咗間屋就一了百了！」

她斥責政府部門集體失職，「你唔使還番啲死者一個公道麼？唔使對我哋宏福苑幾千個人有一個交代麼？你宜家唔係一個人問題，係幾個部門集體失職呀！」

洪女士提供
洪女士家中外望（洪女士提供）

多月來精神受折磨

再次上樓的洪女士，表示心情仍然激動、難以形容，「好難做好咩部署，有陣時上到去個人好亂，我都唔知應該執啲乜嘢，好混亂。」她仍難以接受需要與單位告別，「我唔想講呢兩個字呀，但我有好似以前咁，執完嘢，坐喺梳化度望住屋企個海景，比個腦完全發吽哣。」

她至今仍時常記掛單位，「其實我唔係第一次番嚟，我咁多個月我放假都會番嚟，喺後面元洲仔公園嗰度望住我屋企，雖然番唔到上去但我都要睇一睇。」

「咁多個月真係一個精神上嘅折磨，嗰啲折磨真係好難形容，咁多個月瞓得唔好啦，不斷有啲咩新嘅消息呀又要消化啦。」

「叫我哋去面對現實，有陣時真係好難去面對現實。」她對前路感到惆悵，「特別好似我哋呢啲接近退休，可能人生已經規劃好晒。」「但宜家我要重新規劃，所有人生規劃打亂晒，要重新規劃，我唔知點樣規劃！」

業主大會遲遲未見：有得say咩？

居民要求舉行的業主大會，政府委任的管理人「合安」已向土地審裁處申請延期。洪女士認為居民聲音不被聆聽，亦無從選擇，「想開個業主大會都困難重重，我哋可以做啲咩，咩都冇得揀，完全冇得選擇。」「有得say咩？有人care咩？有人關注我哋宏福苑，但冇人關注我哋真正嘅需要！」「淨係識逼我哋去賣業權！」

洪女士又批評立法會議員未有協助宏福苑居民，「請問半年以來，咁多輪聽證會，係赤裸裸嘅失職，嗰啲高高在上、坐喺立法嘅殿堂上面嘅立法會議員，有冇一個為過我哋宏福苑出過聲？我已經就嚟懷疑，公道呢兩隻字喺香港係咪已經消失咗，除咗叫我哋賣業權，有為我哋做過啲咩呢？」

政府所稱的「樓換樓」選項，洪女士亦表質疑，「宜家係用佢定嘅價錢賣咗間屋，再用佢定嘅價錢買佢嘅樓，咁樣唔係『樓換樓』。」所謂不同的安置方案，洪女士認為「所謂幾個計劃，咪粟米肉粒同肉粒粟米嘅分別囉！」「其實我哋得一條路，但呢條路係咪我哋想行？有冇問過我哋意見？」

她又質疑政府處理善款的安排是否合乎程序，「香港政府成立咗間有限公司嚟購買我哋嘅業權，但我想知以宏福苑名義籌番嚟嘅善款，呢間同宏福苑冇關係嘅公司係可以使用善款嘅咩？合唔合乎程序呢？又合唔合乎法例呢？」

宏盛閣居民原定將於5月27日至29日再次上樓，但洪女士因有要事而需調動上樓日子，她指安排「人性化」，諷指「多得幾個部門集體失職先令我哋冇機會多謝香港政府」，「多謝香港政府特別恩恤，等我哋可以改日子番屋企。」