【宏福苑五級火】家屬擬反對合安延期開會：如果唔得 香港冇希望
【獨媒報導】宏福苑247戶業主聯署要求開業主大會後，政府委任的管理人「合安」向土地審裁處入稟延遲開會，業主有反對必須在21天內，即6月2日前親身提出申請。母親在大火中罹難的家屬Phyllis今天上樓後表示，計劃和數名居民、家屬向土地審裁處提出反對。聯署發起人江祥發早前涉詐騙被捕，Phyllis坦言感到壓力，覺得「唔好亂咁走出嚟講嘢，我諗大家都比呢樣嘢嚇親」。不過她仍然堅持爭取，「如果我去法庭提出個反對通知都唔得，香港真係冇希望，我唔想係咁。」
Phyllis今天上樓，尋回母親的紅色眼鏡，她拾起一個個散落部件，拍下照片留念。Phyllis又在母親的床上坐了一會，感覺傷感：「咁就最後一次喇？如果可以返嚟就好啦，如果返屋企唔好咁困難就好啦，如果可以原址重建就好啦。」
Phyllis媽媽的眼鏡
上樓尋回母親衣物、眼鏡
火災後在殮房認屍，Phyllis看不到媽媽的眼鏡，她今次上樓終於找回這副紅色眼鏡，將散落的眼鏡臂、鏡片、鏡框逐件拾起，拍下照片留念，她估計眼鏡的位置或許就是母親最後身處的地方，形容「搵返就好似解開迷團」。
Phyllis今次又收拾了多些媽媽的衣服、披肩、鞋子等，她說會考慮將這些衣衫燒給媽媽：「因為佢走嘅時候咩都係新嘅，我哋冇攞到佢啲嘢去陪葬」。她家中的公仔被熏黑，上次上樓未有帶走，不過後來看到有街坊帶走公仔後「救得返」，於是今次也在家中帶走了公仔。
Phyllis今日花了不少時間，仍未找到母親的鑽石耳環，她向母親喊話「嗌咗幾次，希望睇下佢會唔會想我哋搵得到，『阿媽你好搵出嚟喇喎，喺邊呀究竟？』」
坐母床上感傷感 「咁就最後一次喇？」
兩次上樓之間，Phyllis在腦海中預演要打開的抽屜、物件如何執齊。她直言緊張，昨晚失眠至凌晨4時，一方面眼前有3小時收拾的時間限制，另一方面也擔心「最後機會，唔攞就冇，就會令你好緊張」。
第二次上樓，Phyllis自言比較冷靜，「第一次上去，心噏好多嘅，始終發生意外咁耐以嚟，先能夠第一次返去，呢個感覺係好差。」加上上次上樓下雨，她感覺趕急、混亂，執拾過程有遺漏。
Phyllis說今日天氣好，感覺炎熱辛苦，但自己「多咗啲時間可以真係慢慢坐低，望下、影下相，唔係純粹將啲嘢狂風掃落葉掃晒走」。
Phyllis當今次是最後一次回家，用了些時間坐在媽媽床上，一邊想著今次是最後一次回家，形容感覺傷感：「咁就最後一次喇？」她有向家園道別，臨行前問哥哥：「捨唔捨得走？」哥哥就回答：「在心中」。
Phyllis媽媽的床
Phyllis說很多警察在現場幫忙，雖然對方沒有給予壓力，但自己因有外人在場，感覺不好意思而有負擔。她指上樓辛苦，會再思考是否申請再次上樓，但也反問：「自己屋企，點解要限住我次數同時間呢？」
仍盼原址重建 惟不能發表
終於獲准第兩度回家，Phyllis回想災後居民多次要求上樓不果，「唔係我哋嗌晒救命話要上樓，你都唔比我哋上樓，早啲比我哋呀嘛，咁啲嘢唔使吽到發晒霉、生晒蟲。」災後政府不同事情的處理，都令她覺得重蹈覆徹：「同成個大火係一模一樣，我哋不斷投訴不斷掙扎，你都唔理我哋，係都要搞到出事先理。」
談到長遠安置方案，Phyllis形容大家同樣「嗌晒救命」，她覺得政府的三個選擇，即收現金自行安排、參與特設銷售計劃，以及「樓換樓」，如同「冇選擇」。Phyllis希望政府多聽民意，「咁多居民聲音你聽下，你叫司長局長聽下，你落嚟大把嘢聽。如果唔係呢個政府點樣挽回聲望？」
她將交予哥哥決定安置方案，但認為特設銷售計劃選項太少也不適合，例如原區唯一選項頌雅路西「又遠又對住墳，又遲落成」。Phyllis一直希望原址重建，她說今天話別家園時，覺得「如果可以返嚟就好啦，如果返屋企唔好咁困難就好啦，如果可以原址重建就好啦」。不過她慨嘆聲音似乎沒被聽見，「不過政府好似聽唔到，又唔比我哋發表呢個意見。」
對江被捕感壓力 「唔好走出嚟講嘢」
連日來很多街坊向記者表示，希望在業主大會就安置方向發表意見。247戶業主曾聯署要求開會，換來消息卻是「合安」入稟申請延遲開會，而發起聯署居民江祥發被捕。
Phyllis指開業主大會是希望表達聲音，「我哋咁想大家聚埋開業主大會，其實都係想有啲嘢可以表達到、統計到」。她引述獨立委員會主席陸啟康曾著市民「行出嚟」監督屋苑，揶揄道：「陸官係咪跣我哋？叫我哋居民要行出嚟，我哋行出嚟個結果呢？」
Phyllis形容街坊聯署要求召開業主大會、寫陳情書，「大家都冒住擔憂秋後算賬嘅風險，大家都驚㗎，但係我哋都要行出嚟，唔係你叫嘅咩！你叫我哋行出嚟，跟住彷彿提出問題嘅人係咪解決咗？」她形容街坊表達聲音並非搞事，「我都呼籲啲街坊要行出嚟表達我哋嘅聲音、心願，唔係啲乜嘢訴求，我哋唔係嚟搞搞震。」
《獨媒》曾經請Phyllis就「合安」召開簡介會作回應，但江祥發被捕後，Phyllis指希望取消訪問，她會如何形容當前感受到的壓力？Phyllis形容「就係唔好亂咁走出嚟講嘢，我諗大家都比呢樣嘢嚇親，大家都會擔心邊個出嚟爭取、帶頭，就要被查，總會查到有啲嘢。」
她指「相信政府唔係咁意思，但大家觀感係咁，大家唔敢講嘢。咁唔好再叫我哋行出嚟，唔好喺香港買樓、唔好投資香港，冇保障，仲話立法收我業權，係咪恐嚇？係咪威逼利誘？Sorry冇利誘過。」
擬反對合安遲開會
話雖如此，Phyllis仍計劃和幾名居民、家屬向土審提出反對合安延遲開會，她說雖擔心出頭有風險，仍覺得要行動，「我覺得真係唔可以唔做，如果我去法庭提出個反對通知都唔得，香港真係冇希望，我唔想係咁。如果接二連三，一個都係咁，唔通兩個都係咁，三個都係咁？咁就唔係個別人士有問題，咁就係成個制度有問題，『唔理想』」。
她要求開會討論宏志閣前路、居民就安置選項的意見分佈，以及合安發還退款一事。她批評「合安唔清唔楚，成日失蹤，搞個網上簡介會當係（業主大會）。」她認為「合安」未經業主大會同意，無權發還大維修退款，「佢自把自為，佢係管理人嚟咋，佢使我嘅錢有冇問過我？」
不過她也表示曾詢問律師，得悉法律程序需時，對6月30日前可以開業主大會不感樂觀。
聽證會人人事不關己 「都係真相嚟」
除此以外，聽證會下月將再續，未提會否再傳召事實證人，作為涉事方，差不多全程旁聽，Phyllis覺得聆訊有令她更接近真相嗎？她說「接近到，個個都話唔關自己事」，她冷笑一聲說：「個個都話唔關自己事，呢個都係真相嚟嘅。」
