【獨媒報導】居住宏仁閣18樓李生上周五（5月23日），與哥哥再回到陪伴自己40多年的家，無可奈何當作「人生最後一場世界盃決賽」。李生本身是多年港隊「die-hard」球迷，自言人生最重要是媽媽、太太及足球，惟半年內先後經歷港隊失落亞洲盃決賽周資格、屋企大火及媽媽離世。他稱：「咁唔代表我放棄我嘅人生，我覺得宏福苑嘅街坊、大埔人好tough，佢哋幾咁唔開心都生活緊，見我哋燒咗層樓都返工啦。」

李生雖然對去年11月19日對新加坡的賽果感到失望，但仍沒有改變對港隊的愛，正如大火後的宏福苑一樣，「就算香港隊踢到幾差，宏福苑有幾爛，都係我嘅香港隊，都係我嘅屋企」。不過，41年前在宏福苑萌生的「港隊踢世界盃夢」，他則坦言「等於我返到宏福苑重建個機會難啲，定香港踢到世界盃都難啲呢？我都唔識答，好似似乎兩個問題都係infinity嘅」。


李生最喜歡的球員是尹志強及簡東拿，回家後在家中揮動簡東拿旗幟。

今趟回家當作「人生最後一場世界盃決賽」

居住宏仁閣18樓李生，上周五（5月23日）再次與哥哥回家，背上宜家傢俬藍色環保袋，手執一張清單，列出今趟「旅程」必須取走的物品：媽媽的菜刀鑊鏟、巨型陶瓷蒸魚碟、曼聯傳奇球星簡東拿（Eric Cantona）旗幟、爸爸的刺繡牌匾、Formula 1圖冊、公事包、狄克及中華英雄漫畫等，「其實我樣樣都唔想攞，我想返屋企」。

今趟李生無可奈何當作最後一次回家，穿回第一次上樓印有「“GOOD DAY” ZARD SINCE 1991」的淺啡色上衣， 憑歌詞訴說心聲：「Goodbye and why don't you leave me alone. Goodbye and somebody tell me why.」上樓前李生向《獨媒》稱「去到呢一刻，每次返上去，就等於人生最後一場世界盃決賽，邊個答到你仲有冇第三次呢」，又苦笑指：「香港人請假去旅行，大埔人就請假返屋企，請假返屋企，簡直係好magic嘅童話故事嚟。」


李生的執拾清單，亦提醒自己為帶不走的灶頭及大圓枱拍照

宏福苑萌生港隊踢世界盃夢 堅持40年仍不變

「我人生最重要有三樣嘢，阿媽、老婆同足球」李生說，上次回家帶走了數百本絕版足球雜誌，包括《奪標》、《足球世界》及《精工82》等，裝滿數個尼龍袋搬落樓。他指每本雜誌陪伴自己成長，坦言多年來不會特意翻箱倒籠逐本雜誌揭，「點解會攞返，呢啲係全部自己嘅回憶」。他亦讚揚部份雜誌高質，在互聯網未流行的年代，是球迷主要獲得資訊途徑之一，如《足球世界》不時翻譯外國足球雜誌文章，以及售賣球星的相片，「呢啲都係自己40幾年生活好重要嘅一部份」。

李生是數十年的港隊球迷，對港隊「情意結」很單純：「代表我屋企踢呀嘛」，形容往時「簡直係被遺棄嘅一群」，常被人戲言「港隊都好睇嘅！咁屎」，「你問我宏福苑咁爛，我都係咁鍾意宏福苑，呢個係我屋企嚟㗎嘛」。即使千禧年初起陷入冰河時期，傳奇球星蔣世豪「城門谷事件」心灰退隊，李生無論成就高低仍與港隊「齊上齊落」，依然堅持入場撐港隊，更直言「夢想有一日現場睇香港隊踢世界盃」，而這個夢正是在宏福苑萌生。

1985年5月19日世界盃外圍賽，港隊北京工人體育場作客，最終以2：1贏中國隊出線。當時10歲的李生與哥哥在家中觀看直播，他悠然記起補時階段那刻感覺，「嗰陣時領先二比一，仲有幾分鐘補時，我同我啲阿哥嗌兩個字嘅啫，唔係講粗口，係嗌『頂住』，卒之係頂到嘅，咁大概喺晚上10點零鐘開始呢個夢」。

「就算港隊踢都幾差，宏福苑有幾爛，都係我嘅香港隊，都係我嘅屋企」

談到去年11月19日港隊主場不敵新加坡，無緣晉身亞洲盃決賽周。原本將沙地阿拉伯旅程納入人生短期規劃的李生，賽後深受打擊，請了兩日「no pay leave」嘆：「11月中被新加坡反cup，同幾個相熟波友一早約咗2027年沙地阿拉伯見，跟住嗰幾日後就火燭……睇香港隊踢世界盃，其實自知之明啦，真係太遠啦，咁香港踢得啲大賽，即係我自己真係有今生無來世，我唔知有冇下一次，所以舊年其實我好唔開心。」人生頓時失去焦點。

不過，李生雖然感到非常失望，仍沒有改變對港隊的愛，正如大火後的宏福苑一樣，「就算香港隊踢到幾差，宏福苑有幾爛，都係我嘅香港隊，都係我嘅屋企」。至於發了41年的世界盃夢，他則坦言無法估計：「等於我返到宏福苑重建個機會難啲，定香港踢到世界盃都難啲呢？我都唔識答，好似似乎兩個問題都係infinity嘅」。

無法再品嚐外亡母廚藝 取走鑊鏟、蒸魚碟留念

「100％大埔人」的李生在圍頭村出世，8歲起一家十口遷入新落成的宏福苑，由任職三行的爸爸靠木銼一手養大八兄弟姊妹，哥哥姐姐陸續結婚搬走。屋內大部份裝修出自李爸爸雙手，每一個角落盛載著兩代人的回憶，客廳圓形印花地磚是爸爸及哥哥逐塊拼砌，廚房大理石灶頭及鋅盤為5呎3吋高的媽媽「tailor-made」：「就返佢身高唔使曲手炒餸，切菜洗手盆嘅位置較高，方便媽媽切菜。」

家中的木製大圓枱，過去是一家人大時大節聚餐地方，惟李媽媽多年前因身體問題入住院舍，至今年年初逝世，最後一餐團圓飯已是2009年。李生帶不走大圓枱，更無法再嚐媽媽手勢，只能取走鑊鏟、菜刀及巨型陶瓷蒸魚碟留念，「你幾時屋企會蒸到條兩斤嘅東星斑？梗係過時過節呀嘛，呢啲又係回憶嚟，嗰陣時我最鍾意食我媽嘅蠔豉髮菜豬腩肉，另外農曆年佢就會煮齋，家常便飯就係梅菜肉餅、榨菜肉餅」。


媽媽的菜刀

屋內牆上掛起的百鳥刺繡牌匾，是李爸爸的行家贈送新居入伙賀禮。李生感謝義工幫忙，方能成功拆卸牌匾落樓，「我老竇個手工真係好好，蘇生（義工）話用人手甩唔到條鐵線，老竇整得好實淨，後尾喺士多房搵返老竇架生個鯉魚鉗，先至拆到落嚟」。


百鳥刺繡牌匾（圖片由受訪者提供）

臨別前在家獨處十分鐘 嘆「送君千里終須一別」

將要離開爸爸一手建立的家，李生坦言「我諗冇大埔嘅街坊或者香港人會形容我哋係自願，我係被迫咋喎，可唔可惜？咁梗係可惜啦，你自願就係自己決定，咁我係被迫㗎嘛，我帶走手磨電鋸鎅返幾個磚頭為紀念咩？」

離家前最後一刻，李生稱「送君千里都終須一別」，他請義工及工作人員離開單位，給自己10分鐘獨處時間，圍繞家裏走一圈，拍片記錄帶不走的飯枱及灶頭，又拍攝廁所窗外景色，狹縫中亦能遠望比華利山及吐露港，「你諗吓宏福苑地靈人傑，係一個好漂亮嘅地方，有啲街坊我相信㗎，佢每隻窗都係望到海景」。


圖片由受訪者提供


圖片由受訪者提供

半年歷三重「難關」：宏福苑街坊、大埔人好tough，幾唔開心都生活緊

李生落樓後將家當暫存迷你倉，除了清單列出必取的物品，亦取走停留在2025年11月的月曆，慨嘆「去到嗰一日囉，其實而家所有街坊我諗都unknown，無論前程係點樣，都係啲不確定性」。另一取走物品是《文匯報》1986年出版的《世界盃86》，當時售價10元，相比其他4至5元的足球雜誌貴足一倍，他稱「當其時我都諗過買唔買，因為對我學生哥嚟講，1986年係10蚊」，其餘則有1997年香港電訊出版黃頁、剩餘數本的《奪標》、與姪仔玩過的紙飛機、電影《花樣年華》劇照、1995年與夏韶聲的合照、許冠傑香港情懷90演唱會黑膠碟等。

他又向記者展示上次取走的出世紙，與亡父亡母的另一種連繫，「有齊晒我阿媽我老竇我個名，有埋我老竇個職業。」他直言實際作用不大，但認為「如果人生每一樣嘢都計實際作用，咁其實人生冇意義㗎啦，當然另一個角度睇，理性務實啲啦，向前看啦，嗰啲人有嗰啲嘅睇法，咁我唔係唔理性務實呀，我仍然都係日做十幾個鐘，係咪先？我都冇問人接濟我嘅生活」。

半年內經歷港隊失落亞洲盃決賽資格、屋企大火及媽媽離世，李生嘆「你叫我happy就真係做唔到㗎啦……廿零歲事業唔順意，唞一唞放一個悠長假期，嘩！你51歲又嚟一鋪，咁唔代表我放棄我嘅人生嘅，我覺得宏福苑嘅街坊、大埔人好tough，佢哋幾咁唔開心都生活緊，你見我哋燒咗層樓都返工啦，我哋幾tough，係咪？」

安置方案如「蘋果、橙、士多啤梨一樣都係生果」

回歸現實，對於是否出售業權及安置方案，李生則指需要與哥哥再考慮，認為「其實我哋點揀，我諗記者朋友都好清楚，其實都好似一樣咋喎……蘋果、橙、士多啤梨一樣都係生果，有選擇！蘋果、橙、士多啤梨係唔同㗎嘛，但係佢歸類為都係生果，所以政府對我哋係好好嘅！有益身心」。

他又指沒有興趣聽合安的簡介會，但尊重每個居民意向，了解很多街坊要求開業主大會，並苦笑稱「合安唔開其實好體恤我哋，驚我哋1984戶聚埋一齊嘅時間，我哋太過負面啦個情緒，驚我哋太傷心，所以唔開嘅啫」。他亦「讚揚」合安核實業主簽名，「如果當日嘅業主大會嘅持份者，管理處又好、民政處又好，有啲唔出現聽證會嘅顧問都好，有幫手核實，就唔會有今日咁嘅發生，如果當日係合安幫助我哋，管理公司而唔係置邦，簡直就wonderful啦！」

至於有居民不滿政府將捐款用於收購，李生就相信政府運用公帑自有「公義」，最後會安排一個「好情理兼備」方案，強調「政府一定唔會貪大眾市民捐嘅錢」，但稱「關於政府點樣運用筆錢，係歸類為公帑定係沿着一個善款幫助我哋重建家園，呢個當然係要問返負責嘅高官」。

版權: 
禁止衍生