【獨媒報導】今日是宏福苑居民第二輪上樓最後一天，76歲、居住在宏道閣的居民蔡先生認為，政府「樓換樓」選擇不多，兼要抽籤決定單位，希望政府提供更多相若呎數的單位選擇：「你俾我哋揀咗先，心目中有得著落，我先至賣個業權俾你最好嘅。」

居住在宏道閣30樓的蔡先生，他今日首次上樓執拾，指第一輪因腳痛未能回家。面對酷熱天氣，他準備濕、乾毛巾各一條，希望盡力慢慢行上樓。相隔半年再度回家，蔡先生就慨嘆「我都好唔捨得㗎」：「經常瞓覺發夢都醒，成日都掛住，今次有機會返到去，望吓住咗40年屋企係點樣，有感情㗎嘛，大家都唔捨得。」

盼訂立明確安置方案 強調居民是受害者

不過，他坦言無法擔心或未能再回家，只能在3小時內「盡執」：「當然有4個鐘頭最好啦，根本係好匆忙嘅時間，都唔夠但冇辦法，政府規定咗嘛。」

對於政府收購業權，蔡先生坦言無法左右政府決定，期盼當局能訂立明確的安置方案，讓每名居民覓得長遠居所，並強調居民是受害者，「我哋唔係自己燒自己嘅屋」。他指本港現時樓價飆升，難以用相等現金購入其他居屋，呼籲政府「唔好話你俾咗錢之後，你自己就顧自己，喺市場買到樓買，買唔到就係你嘅事」。

嘆部分單位位置「山旮旯」 年長無力加錢買私樓

然而，蔡先生提及「樓換樓」方案目前只有數項選擇，不滿政府提供的部分單位位置「山旮旯」，局限了居民選擇：「依家得沙煲罌罉樽5樣嘢揀，5個地方你揀到就揀，揀唔到就下一期⋯⋯就算二手都冇所謂，即係等我哋嘅心安定啲，唔好話我揸住筆錢得個300零萬，話出邊揦埋都要400幾萬，我哋70幾歲點樣爭嗰百幾萬？點搵工？」

他希望，政府除了提供更多相若的呎數單位選擇，更可以讓居民先揀樓，然後才出售業權：「你俾我哋揀咗先，心目中有得著落，我先至買個業權俾你最好嘅⋯⋯退其次嘅政府要承諾我保障你，係要一定安置到，你可以有一個正常嘅居屋」。


羅先生

七旬長者斥安置方案不清晰 不滿剔除原址、廣福公園重建選項

七旬長者、居住在宏盛閣高層的羅先生，他在接受記者訪問時亦有微言，批評政府安置方案不清晰：「成日逼我哋賣業權，賣業權都有個方案，冇方案出！提出一句說話，唔好出爾反爾，呢個係我代表災民嘅要求，好簡單，切切實實嘅答覆俾我哋。」

被問到是否希望舉行業主大會，羅先生就點名民青局局長麥美娟，指其曾說過是否出售業權屬業主的事，惟現時法團由政府委任：「你話你哋自己決定呀嘛，咁你要個法團做咩呀？係咪我哋以後都唔需要法團，每一次維修都係自己顧自己？」他重申，今次事件應由整個屋苑業主作決定，一起開會商量十分合理：「你香港政府怕啲咩呢？」

羅先生表示，居民現時只能「一日望一日」。不過聚令他憤怒的是，政府向居民發出的問卷選項中，不包括原址或廣福公園重建，最後只有現時的選擇：「單位係點樣我完全唔知點揀，買棵菜我都要揀吓啦，何況買層樓？」


馬忠駒

古箏演奏家再上樓取樂譜 出售業權「要慢慢諗」

居住在宏道閣31樓的古箏演奏家馬忠駒，他上次上樓搬走家中18張古箏，今日再度上樓則取回部分樂譜、絕版書籍，及老師送的書。他指由於上樓時間有限，只能選擇先取走最具紀念價值的物件。

馬忠駒指家中仍有大量珍藏瓷器，雖然很值錢，但亦未能搬走。至於會否出售業權，他則稱「要慢慢諗，決策嘅嘢唔可以逼得咁緊」，希望能先想清楚再作決定。

版權: 
禁止衍生