【獨媒報導】宏福苑七幢受災大廈居民第二輪上樓來到最後一日，本身是宏建閣居民的袁先生，今早協助住在宏盛閣的父母執拾，在接受記者訪問時坦言對前路感到徬徨，並哽咽指只能在揀選心水單位後等待抽籤結果：「我帶住兩個屋企，我係好困難囉，對於我嚟講，你問我下一步係點做，我真係答唔到，30幾年我都未試過唔知道個答案點，係好困難嘅一件事。」

自小與父母居住在宏盛閣袁先生，早年結婚一家三口搬入宏建閣。他今次到父母屋企執拾，稱會盡量將所有物件取走：「我諗大家都 feel到個政府應該都唔會想我哋上去第三次。」

再次上樓心情「更加無奈、更加憤怒」

袁先生坦言，再次上樓的心情「更加無奈、更加憤怒」，指憤怒在於意外本來可避免發生，惟相關人士「好似若無其事，乜事都冇發生過」。他指居民在大維修前「應做嘅已經做晒」，包括出席諮詢會反映意見、向政府部門投訴等，對各部門互相推搪責任感到不解。不過他認為，宏福苑居民說話亦「要小心啲」：「因為真係唔知邊啲嘢講得啱，邊啲嘢講得唔啱。」

袁先生指意外發生後有人怪責居民，強調父母大維修前已經提出安全問題，但當時大家認為「好正常一件事」，故「1蚊都冇俾少過」，每期繼續供款大維修。他又指宏福苑居民「好乖」，基本上只有很少居民從未供款，「即係大家都好想快啲完成呢個工程，跟住有個安居落業嘅地方喺度」。他無奈慨嘆：「聽到報告嘅時候都好嬲，但有咩用呢？我想問，即係已經冇用，對我嚟講邊個落鑊、邊個要俾人炒對我嚟講一啲用處都冇，我淨係知道我而家冇咗兩個屋企喺呢一度。」

望先舉行業主大會 促當局「攤出嚟」討論

對於是否出售業權，袁先生稱希望先舉行業主大會，當局應將所有報告及文件「攤出嚟」作討論，如重建及維修所需費用等。他強調，並非不贊成賣業權：「政府你都要話俾我哋聽，點解有咩理據去唔俾我哋去重建，其實我哋訴求好簡單，你話要我哋去換過第二間屋冇問題，但係我哋而家係乜都唔清楚、乜都唔知情況下去買。」

此外，袁先生的單位仍須償還按揭，他曾特意到銀行詢問處理方法，職員回覆稱無法解決問題，遂向解說專隊查詢，獲回覆「你自己問到就問，我都等緊政府覆我」，慨嘆對方「咩都唔知」。

感前路茫茫 需考慮兒子是否適合在新地方居住

袁先生坦言即使選擇「樓換樓」方案，亦只能在揀選心水單位後等待抽籤結果，目前根本不清楚未來去向，向記者哽咽道：「我帶住兩個屋企，我係好困難囉，對於我嚟講，你問我下一步係點做，我真係答唔到，30幾年我都未試過唔知道個答案點，係好困難嘅一件事⋯⋯18歲第一次有啲咁徬徨嘅感覺，唔知道聽日究竟係要點樣，呢個問題係好辛苦好難受，好難受位係我應該點樣去做，因為做一個正確嘅決定，我諗唔到。」

他最後強調無意反抗政府，但指需要考慮兒子是否適合在遷置後的地方居住，坦言：「我係唔知道後面嗰條路你想我哋點行，你話賣業權，究竟我跟你條隊去行嘅時候，我『樓換樓』嘅時候根本就唔知道，全部都係抽嘅，你有10個屋苑俾我，我鍾意嗰個你俾我揀屋苑，但原來我抽唔到嘅時候下一步係點樣呢？」

版權: 
禁止衍生