【獨媒報導】記協前主席陳朗昇2022年9月在採訪元朗朗屏邨業主大會前，被指拒絕向警員出示身份證，上月裁定阻差辦公罪成，判囚5天。陳朗昇上周二出獄，周五便繼續採訪港足。他接受《獨媒》專訪時表示，案件纏擾三年，護照被扣，嘆因此錯過2023年港足出戰亞洲盃。未來他將繼續採訪香港足球新聞，並計劃在今年9月到日本名古屋亞運支持港隊。雖然港隊出線2027年亞洲盃的希望受挫，但希望港人能關心本地足球：「做本地足球係想俾啲踢緊波嘅人都知，職業、半職業同業餘都好，唔係無人理你嘅，你踢得好，大家會見到嘅。」

「5日比起5個月、5年，當然好似易好多，但又唔會無hard feeling。」對於入獄，陳朗昇認為是放下心頭大石，律師指判刑當日是星期五，肯定未能到終審法院申請保釋上訴，言下之意是必須至少坐兩日。一想到這裡，他當刻便決定「輸就疊埋心水入去」。

上訴失敗、即時入獄5日，陳朗昇在高等法院隨即被懲教署人員帶走，並扣上手銬。在高院羈留室內，陳朗昇坐在那張不鏽鋼的椅子上，感到不太舒服，看到牆上盡是前人寫上的心聲，包括「好想攞到保釋」、「我想探阿媽」。他在等候期間換了多副手銬，並作全祼搜身檢查，直至晚上6時才登上囚車。


資料圖片

感謝「送車師」雪中送炭 囚車內「第一次好慢咁望香港」

在出車的時候，陳朗昇看到高院門外的「送車師」：「快啲出嚟啦，可以睇世界盃啦。」他感到雪中送炭：「如果我採訪呢單新聞，都未必會等到咁晏。」

在荔枝角收柙所指模房內，陳朗昇形容如大學迎新營學會收生，多個櫃枱處理不同事務。他再次打手指模、被搜身、穿上囚服及見醫生，懲教人員亦十分友善。在入獄前，陳朗昇原本準備了糖尿病及血壓藥，但因為未有放進指定藥盒及寫上名字，最終只能服用獄中的藥，有人員每日為他量度血糖。

在囚車內的時候，陳朗昇驚嘆「第一次可以好慢咁望吓個香港」：「原來中環同西隧係咁，的士站無人等的士」，「但去到囚室就發現時間行得好慢。」由於塞車關係，陳朗昇在晚上12時才到達囚室及吃飯，他還記得晚餐有一塊山竹牛肉：「我自問對食都有要求，但真係唔係難食。」

昔探監今變被探監 「係有啲唔好受」

從事新聞工作多年，做過「保安beat」，去過多間懲教署院所，監獄對陳朗昇來說其實並不陌生，加上近年常常探監。今次入獄轉換角色，陳朗昇自嘲「終於坐咗去畀人探嗰邊」。他認為不致於以「落難」形容，全因社會環境有變：「最尾自己都要企喺呢個位，係有啲唔好受嘅講真。」

陳朗昇平日晚上會打機、睇波，或是聽網台節目，在梳化抱頭大睡，在凌晨4時便會醒一醒，然後便洗澡再入睡。在獄中的首晚，陳朗昇把《在囚人士須知》讀了數遍，斷斷續續「瞓吓醒吓」，熱醒後發現枕頭、床單都是汗水，早上約7時再被電視機聲嘈醒。

早餐吃過早飯便看電視，陳朗昇笑言從未試過「咁鍾意睇電視」，惟「新嚟新豬肉」不敢貿然轉台。他提到獄中有不少內地囚犯，喜歡收看港台電視台的國劇：「應該係細過以嚟，最渴望睇電視嘅時刻。」

自言睇無綫匪夷所思 晚上想念妻子

懲教人員在午餐分別派粥及麵包，陳朗昇笑稱自己懶醒，只吃了麵包沒有吃粥，後來才發現「無飯食」，到傍晚才再食飯。記者出身，始終具備好奇心，陳朗昇發現前一晚倉內的電視較遲才熄機，原來因為要收新囚犯的關係，向囚友了解後知道周六、周日不會收新囚犯，電視在晚上7時多便關上：「唯有坐吓瞓吓，同囚友傾計。」

除此之外，陳朗昇又發現懲教署會錄影昨日的無綫節目，早上在另一頻道播放：「我狂睇《愛回家》、《香港探秘地圖》，都幾匪夷所思。我已經好耐無睇過TVB，但又真係幾好睇，我諗入到去係咩都好睇。」不過陳朗昇最在意的是，電視新聞未有提及宏福苑五級火的後續。

「原來TVB都有播我坐監嘅，所以囚友都知我係邊個。」陳朗昇遂與囚友互相了解一番，包括入獄原因、自身疾病，如是者斷斷續續睡覺。他在晚上9時睡醒：「我問自己，點解要入咗嚟呢？之後再迫自己瞓囉，嗰陣時係最掛住老婆，一個人寂寞嘛。」他心中默默跟上帝說：「都真係好難捱呀，祢都要陪吓我。」

巧遇何伯為對方祈禱 與囚友交流成意義的事

在周日，陳朗昇與囚友交流，有囚友向他查詢法援、口供紙內容，當中包括被控有意圖而傷人罪、77歲的何伯。陳朗昇坦言一直沒有留意何伯何太的新聞，初時只看到對方胃口不佳，直至其表示因為與老婆打架入獄，他才知悉「你就係嗰個何伯」。

陳朗昇指何伯不算健談，在閒聊下才知道對方曾是裝修師傅，又分享有不少黑膠唱片及家人的逸事等：「其實好好笑，何伯咁有錢無人知，因為早年做裝修真係可以好有錢。」何伯表示早前曾返教會，陳朗昇本希望能為對方祈禱，自言害羞不敢開口，周日想了一晚便決定在翌日鼓起勇氣。

「佢話教會弟兄姊妹有幫佢寫求情信，我問佢介唔介意同佢祈個禱，佢話好。我希望法官對佢仁慈啲，身體好啲，希望同屋企人破裂咗嘅關係可以收復。」陳朗昇坦言與囚友交流，是在獄中有點意義的事情，尤其協助他們了解案件情況，「都似返個人咁囉」。

獄中七旬長者喚監察社會 陳朗昇回應「世界變咗㗎啦」

另一令陳朗昇較有印象的是一名七旬長者、曾唸大學的囚友：「佢話你哋做傳媒應該監察社會㗎嘛，係咪呀？我話唔係呀，世界變咗㗎啦，無呢樣嘢㗎，我多番強調呢個世界無權力俾你監察。」

家人與朋友在周日探訪，陳朗昇指老婆十分「開心」，原因是獄中生活非常健康，不再顛倒日夜及沒有可樂等甜食。此外，由於陳朗昇屬於「醫院期」，他指在倉內遞物品、協助囚友亦有人工：「所以我最尾出嚟有22.4元，用咗嚟買碌柚葉。」

陳朗昇透露有人周一到獄中「關心」自己，喚其出獄當日不要接受訪問，避免遭到騎劫：「後尾望返原來海外新聞團體有聲援，我心諗都唔關我事，我去做嘢你話我犯法，拉咗又死都要告，告完死都要我坐監。但唔關我事㗎喎，人哋梗係要關心我。你將一個記協主席抌入監獄，咁一定有人寫。」

「依家係美麗新香港」 表明就案件上訴

根據《監獄規則》，每名囚友每周只能寄一封最多4頁的A4紙信件，費用由公帑支付，陳朗昇便寄了一封予家人。談到荔枝角收柙所，陳朗昇指的確較為殘舊，但其所屬的囚室就較為企理，因為「大佬」努力維持衞生情況，只有牆角有少許灰塵。

在5日的鐵窗生涯，陳朗昇不諱言感到矛盾，因為心中既忐忑、不忿，實務來說卻是「好抵」，而且是特別的體驗：「你一方面知道社會係變咗，10幾年前係無可能發生，但依家係美麗新香港，自己都係接受唔到，因為『咁樣犯咗法』坐監喎！我最極端咁講，有一啲人可能冤獄咗一世，我都係5日啫。」陳朗昇最後表明，會就案件作出上訴，尤其就警員在截停搜查時界定形跡可疑人士的定義。

曾與陳肇麒在大埔操練 最喜歡卡斯拿斯

採訪、足球，陳朗昇形容是生命中最重要的兩件事：「19年之後，無咗足球係好難捱。」陳朗昇在九龍華仁書院畢業，校內的草地足球場是其曾經的天堂，他亦有參加麥當勞足球計劃。後來，陳朗昇發現自己起步太遲，遂決定守龍門。他更曾跟隨當時處身丙組的大埔操練，與前港隊代表陳肇麒、彭梓鍵同期：「嗰陣陳肇麒18歲，佢嗰陣同依家嗰樣係一樣！」

陳朗昇最愛英超球會紐卡素，最喜歡的球員則是已退役的西班牙守門員卡斯拿斯，因為對方把關守法優美：「我同佢出世時間差20日咋，可以差咁遠嘅，哈哈。」除了卡斯拿斯，陳朗昇亦欣賞「萬人迷」碧咸，因為能在低潮中爬起身：「佢其實唔係一個好叻嘅足球員，淨係叻個腦，無頭槌無攔截無速度，淨係叻一樣嘢都能夠屹立到球壇。」


資料圖片

錯過卡塔爾亞洲盃成遺憾 爭公義較出外旅遊緊要

港足2023年到卡塔爾出戰亞洲盃決賽周，陳朗昇對因為案件錯過作客的機會仍耿耿於懷，他曾反問自己「出外係咪咁重要」：「但我覺得自己唔應該被控㗎喎，爭取個人公義梗係比爭取出外旅遊緊要！」


資料圖片

「都話㗎啦，上次去唔到⋯⋯咁都會無第二次。」

時間回到去年11月18日，港足在啟德體育園主場館迎戰新加坡，陳朗昇目睹星州連入兩球，港隊緣盡明年在沙特阿拉伯舉行的亞洲盃決賽周：「安永佳入波嗰陣，成班行家都講要訂機票，我原本仲諗沙特啲嘢好貴。」


資料圖片

擬隨大埔作客亞冠二又未能成行 望到名古屋支持港足

除了卡塔爾，陳朗昇原擬計劃跟隨大埔出戰亞冠二，作客越南河內及內地北京的工人體育場：「我自己鍾意綠色嘛，北京國安，其實全部都好想去，但全部都無晒，揼心揼到呢。」陳朗昇希望今年到日本名古屋，觀看港足出戰亞運會：「我知我攞唔到採訪證㗎啦，但入場前做直播同訪問球迷都好。」

一說到足球，陳朗昇便滔滔不絕，他可說是「汁都撈埋」，亞洲、本地低組別、學界及女子足球都不放過，「我前排先睇完U17非洲國家盃」。對於無法透過康文署「康體通」電腦預訂系統帳戶預訂公共足球場，陳朗昇仍然感到無奈，只能與朋友一起踢波，依靠對方簽場：「其實有時候都想組織啲小朋友踢波，所以唯有死咗心佢囉。」

《立場新聞》被控「串謀發佈煽動刊物」後停運，陳朗昇加入網媒《Channel C》，惟母公司董事被指詐騙「百分百擔保特惠貸款」被捕兼拖欠員工薪金，最後結束營運。陳朗昇轉投另一網媒《Channel We》，去年被指「沒有遵從雇主合法指示」，遭到即時解僱。

獨立記者身份採訪 望港人關心本地足球

上周五港足公布新主帥人選，陳朗昇當日攜上拍攝器材，以獨立記者身份採訪：「我覺得，如果有多啲人嘅平台睇到港足都好呀，下季我攞唔到季證㗎啦，嚟緊希望逐場逐場都OK嘅。」

陳朗昇希望港人能關心本地足球：「想俾啲踢緊波嘅人都知，職業、半職業同業餘都係，唔係無人理你嘅，你踢得好，大家會見到嘅。」他表示日後在本地聯賽的大戰賽事前，在球場外進行直播，「可以幫到香港足球嘅都希望做」。

傳媒生涯四度失業 YouTube開台繼續講宏福苑

陳朗昇在獄中換了新髮型，記者問他是否習慣？他稱「唔好睇呀」：「我個頭頂好薄呀，但又出奇地好多人覺得好睇囉。」「喂，仲有呀，如果中咗六合彩有2億，我會搞支球隊。」

從事傳媒工作20多年四度失業，《獨媒》問陳朗昇會否「自己搞媒體」，他坦言「我無錢」，指現時在YouTube開台亦不容易，一眾KOL早已進入網台市場：「唯有試吓，新聞係要儲、要等。嗯，喺監獄入面係聽唔到宏福苑，呢個係覺得好緊要，宏福苑係要繼續講。」

版權: 
禁止衍生