Phyllis

（獨媒報導）第五輪聽證會今天開始，主席陸啟康宣布不會「升格」成獨立調查委員會，多名居民在會後表示失望，母親罹難的家屬Phyllis表示，不能接受「有啲議員、法團人士、公務員，佢哋唔出嚟」，陸啟康提到，委員會已掌握真相，Phyllis指相信委員會有盡力尋真相，但認為未必是事實全部，「冇出現嗰個部分，會唔會係好關鍵呢？」

陸啟康又提到，倘若「升格」，大火成因報告最早2027年第二季才能提交，宏盛閣居民何小姐表示不介意，「而家七個月都嚟緊，你都嘥咗七個月時間，你話等到下一年其實時間好快過，我唔覺得有咩大問題。」


獨立委員會主席陸啟康

居民不介意明年才有報告

宏盛閣居民何小姐表示不接受委員會不「升格」，指感到失望，她提到捲入大維修爭議大埔區議員黃碧嬌、前法團主席鄧國權應該出席聆訊解釋：「由day one開始已經想佢『升格』，可以搵多啲人做證人，而家佢唔『升格』，就乜人都唔使出，黃碧嬌真係可以橫行霸道。鄧國權嗰啲都唔出嚟講，好似完全冇關係、唔關佢事，但係大維修係佢搞㗎嘛。」

陸啟康提到，倘若「升格」，大火成因報告最早2027年第二季才能提交，何小姐表示不介意，「而家七個月都嚟緊，你都嘥咗七個月時間，你話等到下一年其實時間好快過，我唔覺得有咩大問題。」陸啟康又舉例英國2017年的格倫菲爾大樓火災，事發9年才完成調查工作，何小姐就覺得現在已經進入法律程序，不認為會花很長時間。

何小姐認為現在仍有很多事情未澄清，不同意陸啟康所言，不「升格」並不影響尋找真相。不過她指第四輪聽證會聽到陸啟康發言後，她已有心理準備最終不會「升格」。


何小姐

家屬指「硬食」決定 嘆發聲沒有改變

母親罹難的家屬Phyllis指，不接受部分人未作供「我第一日出嚟做證人，聽完已經講，應該出嚟講嘢嗰啲冇出嚟，好多名字大家都mention過。因為有啲議員、法團人士、公務員，佢哋唔出嚟我覺得唔可以接受。但呢個係委員會決定咗，就係咁。」 

至於未作供公務員是誰，她表示「大家都知道，今日都有再講個棚網片段，係點安排出嚟？係大家約定做突擊檢查，個測試點走出嚟，大家可以翻查啲紀錄。」根據聽證會聆訊，ICU曾預約巡查，被委員會點名的古小平曾作供，另一人劉嘉敏就沒有提交供詞。

被問到是否「硬食」委員會決定，她就說：「我哋不嬲都係硬食㗎啦，我哋有邊樣嘢可以推翻，有邊樣嘢係我哋講完之後有改變？你都見到好多居民出嚟表達，但係應該冇因為我哋表達任何嘢而改變，所以我都覺得唔需要多講。」

料委員會未必尋得事實全部

Phyllis指，相信委員會有「盡力做佢搵到嘅真相」，但「未必係事實嘅全部，冇出現嗰個部分，會唔會係好關鍵呢？會唔會嗰個部分先係最重要、其他嘢揭露咗八成，但係有兩成冇攞出嚟，但係key criteria令呢件事發生？」

不過她亦指理解不「升格」可加快完成報告，「如果唔係可能拖你十年八年，唔係一件好事。如果獨立委員會早啲完咗報告，我哋咪可以做下一步，唔使一個拖字，拖完最後可能都冇結果，咁同呢9個月係一樣。」

她坦言如果要10年後再有審訊，對遺屬來說是痛苦，「考慮大家時間成本、心力，有啲遺屬仲要睇醫生，瞓唔到覺，你仲想佢捱幾耐呢？」


梁浩軒

居民指速度與傳召證人同樣重要

曾作供的宏盛閣居民梁浩軒亦不太認同不「升格」決定：「與其話理解，好多時都係無奈。佢唔『升格』我都冇辦法。」陸啟康指若「升格」，會因為法律程序導致延誤。調查速度還是傳召所有證人較重要？梁先生指可以同步進行，「有啲人想快，可以司法程序解決，但係不可否認要還原事實真相，嗰啲一路未出現嘅人係關鍵人物，佢哋當然需要出嚟講返。」他也提到有些問題未必是違法，例如政府部門之間的協調出問題，「但係因為呢啲問題，導致呢件事（火災）發生。」

梁先生同點名提到黃碧嬌無現身，「我哋偉大嘅區議員，始終做咗我哋宏福苑咁多年顧問，出嚟關心吓我哋都好必須。」

宏仁閣居民何先生則表示很多事情仍未清晰，「好多重要問題未出現」，希望「升格」委員會，運用法定權力以傳召區議員、承建商、業委會等人。陸啟康表示已經掌握資訊，有信心作研判，何先生就認為委員會的資訊要公布，「所謂掌握，會唔會比一般市民都知道呢？佢唔公布嘅話，佢掌握到我哋都唔會知，佢點樣處理，真係唔知。」


何先生