【七一】雷玉蓮、劉公子、李盈姿……的七一

【獨媒報導】今日是七一回歸日，「女長毛」雷玉蓮下午頭戴黃傘頭飾，手持三張標語，寫上訴求「醫療日日加，物價日日貴，市民日日慘！租金日日加，舖頭日日執，工作日日冇！外勞日日多，人工日日減，市民日日死！」她從銅鑼灣站遊行至維園折返。

維園足球場傍晚舉行回歸盃，蓮姐看著圍封的足球場，慨嘆「今非昔比」：「嚟到呢度都好唏噓。以前可以維園出發遊行，今世都唔會再有。」

蓮姐回想，從前七一人頭湧湧，現在只能一人「遊行」：「而家得我一個人，拎住三張訴求，以前什麼政黨、什麼政黨，全部喺晒呢度」。不過她說要繼續表達訴求，「死剩我一個都繼續嚟，堅持做得幾多得幾多」。

劉公子：「唔可以做太多，大家心知肚明」

富商劉定成今日亦來到銅鑼灣，他說六年前七一因非法集結被捕，今天來「遺址憑弔，回味一下」。劉公子說今天和其他市民一樣「吃喝玩樂」：「食下飯，行下街，飲下茶。唔可以做太多，大家心知肚明。而家有好多restrictions，係不可抗力、不可理喻，所以我哋唔講嘢為妙。但係個人出嚟支持，身體鍛鍊吖嘛。」

今年6月4日劉公子亦有現身銅鑼灣，他當日面對傳媒提問時，做出「閉嘴」手勢。劉公子提到，今年六四、七一前皆收到警民關係科來訊詢問行蹤，他回應指今天和六四一樣，不會受訪。

不過就兩個敏感日子而言，劉公子說警方對六四較為緊張，七一則只是「離遠監視」，「今日冇人叫我唔比食飯，睇嚟今晚都可以食飯。」

劉公子認為「無聲勝有聲，唔講嘢多人睇，佢想好奇究竟你比人毒啞？定自己毒啞自己？」

他最後重申今天並非受訪，「閒談同訪問唔同，你冇個咪對住我，我淨係清唱，噏幾句。」

李盈姿指社會收緊 惟精神不死

牙醫李盈姿亦到銅鑼灣，她形容警方「如臨大敵，成街都係便衣」。她說今早在灣仔游水時便衣警截查搜身，等待她離開時又送她到港鐵站。她之後參與教會祈禱會，又有便衣尾隨，並「一路跟我嚟銅鑼灣」。

李盈姿說年年五一、七一、十一游水都被尾隨，對此感到荒謬：「我細細粒，又年紀大，做得啲乜？」她也補充，每逢這些日子前夕，皆會收到警民關係科或國安處來電，詢問其行蹤。

李盈姿今天穿著毛澤東「為人民服務」T恤，她過往六四、七一亦曾穿著毛澤東上衣，她笑言是「保護自己」。

今天回歸，覺得今年社會有何變化？李盈姿指感覺「越嚟越收緊」，但是「見到公民社會我哋人仲係喺度，精神不死。我唔知佢要防我哋防幾耐，係咪防到我哋呢一代死晒？」

有人身穿「由字及興」T恤

晚上約9時40分，一名身穿「由字及興」白色上衣男子站在銅鑼灣SOGO門外吸煙，在場有大批便衣警員舉機拍攝，約五分鐘後有數名便衣警員上前詢問，將其帶上警車離去。