【獨媒記者東京直擊】漫畫家尊子在抵達成田機場那一夜，正好遇上千葉暴雨水災，他跟過千名旅客一樣被迫滯留，在機場睡了一晚。翌日，他終於可以搭車到東京市區，前往見山書店舉辦的「異國的暑假」（異国の夏休み）展覽，跟其漫畫家朋友一木，向讀者分享香港漫畫史的研究。

尊子畫政治漫畫已有40年，他曾在《明報》設有兩個專欄，直至2023年5月相繼被中止。不過這反倒給予尊子一個契機，開展香港漫畫史研究「好多嘢做！其實呢件事我講咗好多年，係依家先有時間做。」

今年6月，尊子也飛到加拿大約克大學主辦香港漫畫講座。「今時今日，大家都知道行動重要過講。偶爾我哋見到有一啲嘢走出嚟，就知道原來朋友大家喺度努力，呢個係互相嘅支援，係重要嘅。」

由漫畫歷史講香港故事

在講座中，尊子與另一位漫畫家一木輪流介紹香港漫畫史上四位巨人：李夫凡、陳子多、王司馬及宋三郎，從1940年代二戰時期說起。

他們提到，四人各有特別的繪畫風格，例如李夫凡常用對聯，在圖畫的左右掛著相應的文句；陳子多在香港出生，筆下的漫畫既沒有固定角色，也沒有故事教訓要帶出；王司馬的畫風細緻，場景與人物表情的線條都很多，更似電影美術；宋三郎以人物反映世代困境，面對失業既哭又笑，風格看似直白，其實婉轉。


講座中，尊子特別提到李凡夫1940至50年代留在香港，剛好避過中國政治漩渦及臺灣白色恐怖：「我哋可以見到，曾經有段時間，係『香港』俾咗個空間啲漫畫家。」

尊子認為，漫畫不止反映作者生平，也反映出整個香港傳媒及社會的變化。他相信，自己可以做的，就是以香港的角度，把香港的故事講出來：「因為我哋見到其他中國國內嘅研究者，佢哋都有講香港，可能講香港嘅經濟、社會、文化，而呢啲人寫作，通常都係選擇，覺得對佢嘅論述適合嘅，先擺出嚟。」

尊子主要從圖書館或檔案資料館蒐集文獻，不過部分如淪陷時期的漫畫，則需從其他地方或菲林相片中尋找。

他又分享，研究另一大挑戰在於「如何解釋社會變化」。每一幅漫畫背後都暗藏著大量資料，可能在很短時間內，甚至一日半晚之間，政治風向已經轉變。他說，如何拆解漫畫家的作品，並為其配上合適的資料說明，是團隊目前面對的考驗，預計還有一兩年左右才初步完成研究。

被問到會以甚麼形式發表研究結果，尊子稱：「我哋暫時都未知，因為香港依家出版方面比較多限制，如果真係喺要香港出得到的話，可能要刪走好多嘢，呢個暫時唔係我哋想做嘅事。」

「我覺得有完整紀錄係重要嘅。」

留香港觀察、思考

不少香港漫畫家已移居他方，例如一木在台灣發展，黃照達就在英國，尊子的打算則是留在香港，「都係繼續留喺度，繼續觀察，繼續睇。因為如果你能夠在地咁睇，好多嘢會清楚啲。」他認為，如果要創作香港有關的東西，不論是漫畫或小說，都不能夠關上門，自己埋頭苦幹，而是需要感受生活，才可以創作出有感受的東西。

他又坦言，自己當然明白有些說話不可以亂講、亂畫：「呢個係好現實嘅問題，唔止畫漫畫嘅人，其他寫專欄嘅朋友，暫時都係唔出聲，睇情況先，繼續去觀察。據聞有啲朋友依家雖然無咗專欄，但自己都會繼續寫嘢，作為一個提醒，將來如果有機會的話，都會講出嚟。」

「漫畫一部分係畫出嚟，需要嗰個技巧，但其實更大部分係觀察，同埋你對某樣嘢嘅睇法。你不斷去豐富自己嘅睇法，就會理解或者清楚啲，知道依家發生緊咩事，未必會被一啲現象去恐嚇（intimidate）得到。拉長啲嚟睇，你會發覺根本就係玩遊戲。」

記者：馮曉彤