（獨媒報導）火災至今逾9個月，政府指逾99%業主已出售業權，意味著今日很可能是宏福苑最後一次舉行業主大會。大批警員下午起於大埔會議場地外巡邏駐守。宏盛閣居民何小姐估計，合安未必會在會上解答居民質詢，但她會爭取發言，亦希望珍惜與街坊相聚的機會。


有旅遊巴士接載居民到業主大會現場

政府日前宣佈，已有 99.1% 宏福苑業主接受收購，78.6%業主簽妥《買賣協議》，剩 17 戶未有回覆。拒於政府死線前出售業權的宏盛閣居民何小姐，今早先往西九龍法院旁聽火災相關案件，傍晚出席業主大會。她表示，目前未有政府人員接觸她：「其實我都無擔心，因為都擔心唔嚟，亦唔知政府下一步會點做⋯⋯如果一意孤行要立法嘅話，咁咪後續再諗吓點。」

何小姐指今日心情平靜，出席業主大會主要為與街坊相見，不認為合安能解答居民疑問：「我哋想要嘅驗樓報告，到而家都冇出，所以我哋真係冇乜期望，盡量睇吓問唔問到啲乜囉。」


宏仁閣業主陳小姐

業主迫不得已賣樓 抽泣稱「一路行一路喊」盼再上樓道別

宏仁閣業主陳小姐抽泣表示，在迫不得已下簽署「接受收購建議信件」，相信今日可能是最後一次以業主身份出席業主大會，但對會議不抱期望。被問到有甚麼問題想在會議上提問，她說今天腦袋一片空白，乘車到場時經過眺望宏福苑，已數次忍不住落淚：「一路行過嚟一路都喊，因為我真係諗唔到嘢可以講得啲咩。」

她期望，政府可以給居民合適的交代，解釋大火發生的來龍去脈，「話俾我哋聽件事係點樣發生。」她亦希望政府能公布樓宇的損毀程度，不解為何居民至今仍未能再次上樓：「點解我哋仲未有機會第三次上返樓呢？」、「我真係好期望可以上多一次去，真誠同呢個屋企講再見。」

陳小姐指，她近日才獲派售樓書，尚未有時間消化內容，但有留意樓價，指即使自己在大埔長大，賠償金額卻不足以讓她在大埔購買一個相同尺數、相同地段的二手居屋單位。她無奈指，自己多月來都被各種相關問題纏繞，感到辛苦，「我每一日都有好多問題要去解決。」、「其實都好辛苦咁多個月嚟⋯已經就嚟十個月，我都知大家好多居民都好辛苦。」


宏志閣業主蘇太

遺屬至今情緒受困 受訪時落淚

宏志閣業主蘇太提早到達大埔會場，她已交回《接受收購建議信》，但坦言心有不甘：「佢意向書梗係寫自願㗎啦，我哋1900幾戶有冇人真係自願嘅先？」蘇太的老爺奶奶於宏昌閣罹難，她與丈夫至今精神情緒受困，時常手震，近日更懷疑有夢遊情況，令她擔心自己會患上精神病。她受訪時想起其他離世街坊時，再度忍不住落淚，期望能在業主大會與街坊相聚。

在大火中喪妻的宏泰閣居民兼遺屬葉家駒就指，相信今次已是最後一次業主大會，亦是最後一次以宏福人的身份參與，因此即使對業主大會沒有很多期望，亦到場出席。他關注法團餘下一億二千萬元的去向，以及火險賠償金等問題。他提到，合安似乎已忘記上次業主大會上，核數師報告被否決，今次核數師報告事項不再在議程之上：「係咪唔需要有表決呢？」

另一遺屬李國鴻亦無奈表示，不對業主大會抱任何期望，「全部由佢主導，你有咩答案啊？」他關注管理費按金和火險賠償，並多次表示質疑，五份保險的費用由宏福苑居民支付，卻全都不獲賠償。他多次強調不合理，「五份保險五份都冇得賠，咁你買嚟做咩呢？」、「咁以後買保險嚟做咩？係咪賠俾政府㗎？」、「「死晒人、冧樓喎，屋企都冇埋！都冇得賠！有冇人去問吓點解㗎呢？」、「錢就我哋比，保險就冇得賠，樣樣都好似我哋唔啱咁而家！」


遺屬李國鴻、葉家駒

86 歲冼婆婆：政府話左我哋唔敢行右，呢啲叫守法

於火災中逃生倖存的宏泰閣業主冼婆婆亦已簽署同意收購書，但形容「好似被老千『千」咗」。她指當年以建築面積呎價購入單位，政府現時卻以實用面積計算收購價，而且「樓換樓」方案的單位實用面積亦非可用面積。

她又表示，自己耳朵不靈光，因此需要女兒陪同出席大會，惟合安曾限每單位一人出席，擔心女兒被拒入場。雖已準備簽約賣業權，但她亦希望今日在會上了解清楚所有資訊：「我係業主嘛，梗係希望知道仲有乜嘢要負責任，唔係第日無端端俾佢拉上差館都唔知做乜。」她強調出席業主大會是其責住，亦關注屋苑旁的天橋和巴士站的公共責任險：「如果搞掂呢啲我就無顧慮。」她又說會爭取在會上發言，惟笑言無「抽獎命」，上次業主大會都沒希有被抽中發言。

86 歲冼婆婆當日在起火大廈苦候 6 小時獲救，後來亦因顧及安全未能上樓。她今日再嘆「我係一個無家鄉嘅人⋯⋯宏福苑就係我家鄉，我哋而家連香港嘅家鄉都無埋，你話我心情點吖？」她無奈指自己只是小市民：「習主席都話我哋係香港市民，香港市民當然要乖乖聽政府話，佢話左我哋唔敢行右⋯⋯呢啲叫守法。」


冼婆婆