鄧炳強（資料圖片）

【獨媒報導】保安局局長鄧炳強今早出席商台節目訪問，再次談及本港存在四大國家安全風險，包括外部勢力干預、本土恐怖活動、潛逃者散播港獨主義，及遠對抗，指「暗湧每日都存在」：「每日啲人都搵緊機會去打『擦邊球』去犯法，例如會煽動，政府監察你嚇你。」鄧炳強批評「最惡毒就係軟對抗」：「因為另外嗰三樣好明顯，普通老百姓市民都知。軟對抗邪惡嘅地方就係，佢邪惡得嚟你未必知道佢邪惡，有時你仲以為佢係好人呀嘛。我喺呢度成日都講，慎思明辨好緊要。」

斥「有啲人好鍾意用貶語」 「天眼」防罪滅罪非監控

鄧炳強今早接受商台節目《在晴朗的一天出發》接受訪問，訪問談及「天眼」計劃，他重申計劃屬於防罪滅罪系統，斥「有啲人好鍾意用貶語」：「我哋唔係監控，係防罪滅罪！啲賊就最鍾意用呢個詞，分化到你啲人，叫政府唔好裝呢啲，係唔好㗎。佢想嚇你哋，令到啲賊有機可乘。」

他強調，每當有人使用貶語、分化政府便要小心，因為防止罪案是當局的工作，「有啲人鍾意用監察呢個貶詞」：「嘩，你一舉一動，無論你正常人都監察住你，呢個咪貶語。監控都係貶詞嚟嘅，冇必要都監察你，呢啲就係想危害國家安全嗰啲插最鍾意用嘅詞彙，三位主持留意呀，千祈唔好俾人哋煽動用呢啲詞語！」

主持問到現時本港的國家安全風險，以1至5分評分現時的狀態，鄧炳強表示難以評分，但相比2019年「黑暴」及港版顏色革命，社會已經相對平穩：「有法可依，大部份人唔敢去犯法，驚拉呀嘛。」


資料圖片

鄧炳強：每日啲人都搵緊機會去打擦邊球去犯法

不過，鄧炳強指「暗湧每日都存在」：「每日啲人都搵緊機會去打『擦邊球』去犯法，例如會煽動，政府監察你嚇你。」他舉例指，有人在社會事件中的民生事項散播「政府咁樣害你」、「政府咁樣唔啱」，重申政府十分願意接受批評：「冇問題㗎，我哋唔係完美，做得唔好嘅地方你俾意見一定聽。但如果你個目的係煽動對於政府，或者中央政府不信任，咁要小心，你發現每日都發生。」

鄧炳強表示，本港現時仍然有四大風險，外部勢力仍在「制裁你、抹黑你」，「明明佢自己條例嚴苛過你就話你」，加上本土恐怖活動，已潛逃到外地的潛逃者散播港獨，及軟對抗：「最惡毒就係軟對抗，因為另外嗰三樣好明顯，普通老百姓市民都知。軟對抗邪惡嘅地方就係，佢邪惡得嚟你未必知道佢邪惡，有時你仲以為佢係好人呀嘛。我喺呢度成日都講，慎思明辨好緊要。」


資料圖片

指宏福苑火災後「好多人講啲假嘢出嚟」 籲電台主持同小心免被煽動

主持關注宏福苑火災中，那些屬於軟對抗，那些屬於「真係幫市民」，鄧炳強指「有好多人講啲假嘢出嚟」：「講政府收返你啲樓，賤價收咗你之後，高價賣俾地產商賺錢，呢個假㗎嘛，政府講得好清楚㗎嘛，用嚟係公共設施呀嘛。跟住話好多防暴警喺度，準備對抗嗰啲災民，當然係假㗎啦，我哋係滅火，點會做呢啲嘢？」

鄧炳強續指，當時有人散播假新聞及假消息，訛稱「消防其實飯都冇得食」、「抗火衣都唔夠」：「當然唔會啦，呢啲人講嘅目的係啲咩，當然係想分化我哋嘅同事，分化我哋嘅社會，煽動市民對社會嘅憎恨。有時你哋都要小心呀！連你哋都想煽動，你哋係煽動目標嚟㗎，你哋係媒體嚟㗎嘛，你影響力好大㗎嘛。」


資料圖片

主持指「我愛宏福」中性 鄧炳強：撈埋一啲咁嘅軟對抗

被問到宏福苑火災後，當局如何分辨軟對抗及協助災民，鄧炳強指「你有機會落去現場睇就好清楚」：「佢哋有好多所謂貼晒啲字出嚟，話政府唔好，政府錯，政府害死人，你見你啲苗頭出晒嚟。」主持稱部分標語十分中性，例如只是寫上「我愛宏福」，鄧炳強就解釋「撈埋一啲咁嘅軟對抗」：「佢撈啲有啲好似好冇嘢，跟住一啲煽動嘅嘢，咁先至令到你信呀嘛。」

主持追問，當局如何處理沒有違法的軟對抗，鄧炳強重申必須留意「立心」，政府有責任向外界說明真相，「我係反駁隊隊長呀嘛」，每名官員及社會上每人都是反駁隊成員：「你見到有啲人特登講嘢呃你，煽動你對於政府嘅不滿，你就要小心啦，所以人人都係反駁隊。」主持問鄧炳強的反駁工作是否繁忙，他就表示，「我希望你三位加入啦，涉及唔公義嘅嘢就出聲啦」。

版權: 
禁止衍生