【愛知名古屋亞運】宏福居民赴日撐港隊 球場上重拾笑容 太太：大半年來最大安慰
【獨媒報導】去年11月大埔宏福苑大火後，居住在宏泰閣的港隊球迷李先生，大半年來與家人疲於處理業權及安置問題，在8月底「死線」前接受政府收購方案，他嘆道：「無論點都好叫做有一個階段settle咗。」
塵埃落定後，李先生攜妻往日本，支持參與愛知名古屋亞運的港隊，當作一個「悠長假期」。
陪丈夫「作客」的李太向《獨媒》表示，其先生大半年來經常失眠，精神狀態極差。不過在今趟作客旅程中，在球場上看到他落力為港隊打氣，與其他球迷說笑閒談。雖然明顯未完全恢復，但已慢慢重拾笑容，李太形容是她大半年來最大的安慰：「雖然我哋屋企叫做冇人命傷亡，純粹係冇咗間屋。」
《獨媒》記者日本直擊
「我做唔到啲咩嘢，宏福苑對佢嚟講真係好重要，佢對宏福苑好有感情……喺呢個環境我真係講咩都冇用，我只能陪喺佢身邊。」
「辛苦都唔緊要，愛一個人就係咁㗎啦，人生一路經歷冇嘢係輕鬆，即係你一定會有辛苦嘅時間，快樂嘅嘢都係短暫，唔開心嘅嘢都係短暫嘅，有個人同你一齊無論點樣都好，好肯定佢會陪喺你身邊已經好足夠。」
「總之日後有啲咩，人生高高低低、風風雨雨、起起跌跌咁，發生咩事我都會陪伴佢身邊。」
李先生（左）（資料圖片）
新婚遇亞洲盃撐港隊優先
兩人於2023年結婚，恰巧撞正港隊出戰亞洲盃決賽週。作為「die-hard」球迷的李先生，新婚不久便「抌低」太太隨港隊前赴卡塔爾。李太稱未感生氣，反而欣賞丈夫「從一而終」：「我係好支持佢㗎，我覺得一個人難得對一樣嘢，咁多年對一樣嘢都keep住嗰個熱情，人最少有一樣嘢係咁，所以我好appreciate佢有樣嘢。」
李太自言這種特性正是丈夫吸引她的原因，「佢對事對人都係好專注，佢認定咗就係㗎啦，呢個好難得，唔係嗰個人都可以」，一如丈夫對宏福苑的感情，「對佢嚟講係一個好大嘅回憶，係一樣好重視嘅嘢。」
李先生感激太太一路同行，知道對方很擔心自己的狀態，「多謝你同我一齊行咗咁艱難嘅路，我愛我老婆，同佢簽個盟約係一生一世㗎嘛。」
留到最後
李先生和李太9月中就到達名古屋，連續觀賞男女子港足賽事。他們原打算「港隊行到幾遠就留幾耐」，惟可惜男女足皆未能於分組賽出線。雖然男足在第二場賽事以1：5不敵泰國提早出局，但李先生會續觀賞男足尾場賽事，支持到最後，及後亦會欣賞不同項目的港隊賽事。
資料圖片
宏福苑發生大火前，李先生不時隨港隊作客，對上一次李先生與太太一同作客，是去年3月港隊作客新加坡出戰亞洲盃外圍賽。亞運前，兩人從未觀看過有不同比賽項目的大型運動會，李先生認為比過往單純一場足球比賽，市面更加熱鬧。
雖然亞運輸贏亦不影響港隊男足的世界排名，但對李先生而言撐港隊無分賽事：「無論香港隊踢咩比賽都會支持。」
夫唱婦隨撐港隊
首兩場港隊男足賽事，均在日職聯球隊名古屋鯨魚的主場豐田市豐田體育場舉行。球場不設接駁巴士往來車站，步行距離約20多分鐘，途中需要穿過豐田大橋。不過這正是球迷「 March-in」好機會，港隊球迷組織「香港力量」安排賽前遊行，李先生及太太跟足全程，落力為港隊打氣。雖然自言對足球一竅不通，但李太懂得每一首Chant，投入程度不亞遜於李生。
「佢係我好重要嘅人，咁我陪佢做啲好重要嘅嘢」，「我都會去投入呢件事，我唔會話為陪而陪，我覺得咁樣對方都好冇癮，所以我都會去嘗試去投入嗰件事，同埋而家捧緊嘅喺香港隊，咁我對香港有感情㗎嘛，同佢一齊做呢啲事好有意義。」李太說。
一場波未踢梗係諗住贏
談到今次港隊表現，李先生認為從備戰開始，感覺足總不太重視亞運。他明白因為並非國際賽期，球會可以選擇「唔放人」。首場賽事，港隊便要面對「東道主」日本，李先生稱「一場波未踢之前就梗係諗住贏」，最終0：2落敗，他當時認為「只要唔好蝕咗度氣」，仍有出線機會。
第二仗面對泰國落敗後，李先生形容後段時間明顯與對手有相當大分野，特別是在身體對抗性、球員跑動及傳球方面，嘆「真係有啲失望，上半場領先之後對手換兩個，直到完場都完全跟唔上對手個速度，當然我哋嘅板凳深度有自知之明。」
對於主教練曾昭達，李先生則頗有微言：「部署上面臨場調動，咁呢個係邊個責任？我唔講啦，係咪可以做得好啲，甚至乎上半場被追和1：1，至少未輸嘅時間，下半場係咪有Plan B，我哋磨住1：1，就算呢場贏唔到，我哋其實下一場仍然有意義。」