【獨媒報導】立法會餐廳上月起由新營運商「時尚聯盟」接手，今日（6日）起正式營業。立法會主席李慧琼與一眾行管會委員出席開幕禮，並率先試食首次引入意大利軟雪糕。作為「雪糕推手」的行管會餐廳招標評審委員會主席陳凱欣，忙於向議員及記者派雪糕，有不少議員大讚好食，選委界何君堯一食即稱「雲呢拿冇得頂」，更即場創作詩句：「去ICAC飲咖啡苦澀味道，嚟立法會食雲呢拿甜蜜蜜！」


龐維仁

新營運商冀餐廳化為「偷得浮生半小時」加油站

立法會餐廳位於大樓地下大堂，原本由維他奶集團旗下的「香港美食」營運，不過由於連年虧損，至今年7月31日合約到期後未有再投標。立法會行政管理委員會及餐廳招標評審委員會，進行一輪評審及招標後，由現時在灣仔警總、電訊盈科經營飯堂的「時尚聯盟」接棒。多名立法會議員今早均有出席餐廳開幕禮，包括立法會主席李慧琼、行管會餐廳招標評審委員會主席陳凱欣、何敬康、陳振英、何君堯、陳恒鑌、楊永杰、梁進和邵家輝。

時尚聯盟主席龐維仁於開幕禮上感謝立法會給予機會，指餐廳雖然不是很大型項目，但「佢喺集團裏面已經成為一顆最照亮嘅明星，因為佢係一個好神聖擺喺我眼中」，形容能夠特別服務為香港市民的立法會議員，非常光榮作為「小後盾」支持大家。他提及陳凱欣曾試食雪糕後，向其稱「一定要有軟雪糕」，於是餐廳努力申請雪糕牌（冰凍甜點製造廠牌照），最終昨日集團財務長親自領取，冀將餐廳化為「偷得浮生半小時」加油站。


李慧琼

立法會主席李慧琼致辭表示，營運立法會餐廳絕非易事，大家對食物、服務、價格等亦有一定要求，餐廳要做到「快靚正、物超所值」，又要符合不同客人口味，笑稱「其實喺立法會做餐廳真係挑戰唔細」，指新營運商試業期間，虛心聆聽及接受意見改善，老闆更經常親自督工，又指餐廳不時會更新菜單，持續為大家帶來新鮮感，今日更有軟雪糕新登場：「軟雪糕喺我哋好多年輕人，或者好多唔同市民集體回憶，亦都讓我哋喺繁忙工作裏面加一分甜蜜。」

陳凱欣「成功爭取」 盼工作時「苦中一點甜」

開幕結束後，餐廳職員向在場議員及記者大派暫未公開發售的意大利軟雪糕。據了解，雪糕將有兩個尺寸出售，定價十多至二十多元不等，並可添加朱古力或士多啤梨醬。何君堯一嘗雪糕即大讚「真係好好味……雲呢拿冇得頂」，隨即與龐維仁握手，更創作詩句：「去ICAC飲咖啡苦澀味道，嚟立法會食雲呢拿甜蜜蜜！」


陳凱欣（右）

至於「成功爭取雪糕」的陳凱欣向《獨媒》表示，事緣去過幾間餐廳試食後，只得一間餐廳提供雪糕，其員工飯堂亦有出售，笑稱「我哋做完嘢，有陣時都係希望苦中一點甜」。她提及廉政公署有咖啡，認為可為立法會餐廳打造品牌：「我嚟參觀立法會，唔一定係雪糕嘅，我都食過佢一種品牌嘅食品」，加上雪糕材料質素好，全部均來自意大利。

陳凱欣續指香港天氣炎熱，趕時間「麵都煮唔切嘅」時，笑言「俾一圈一個cone我，食咗我上去開會都好」。她更分享有議員剛即場將咖啡淋上雪糕，自製「Affogato」，大讚「真係不得了醒神，即係大家都開心啲」。她目前正向餐廳商討雪糕定價，希望增加多些配料，包括生果、脆米等，並為女士及學生推出細份量雪糕。

何敬康倡加「做gym套餐」

不過，熱愛舉重運動的新民黨何敬康就未有品嘗雪糕，他向《獨媒》稱「一個禮拜只能食一次雪糕」，指昨日生日關係前一日已動用「quota」。他認為，餐廳不能僅靠立法會議員光顧支持，公眾亦可以登記入立法會餐廳食飯，又指餐廳要持續生存就要做好營運，始終需要靠客人「用對腳去投票、用口去執行」，並極力向餐廳極力推薦健康「gym套餐」。

餐廳擬設送餐服務

新立法會餐廳早於9月14日試業，李慧琼早前（9月10日）社交媒體發文指，與行管會及餐廳招標評審委員會委員，率先實地了解兼試食早午餐及下午茶主要菜式，稱「替大家驗收」，讚揚「整體滿意」。她又表示，餐廳準備為議員提供點對點送餐服務，令議員無須「頻頻撲撲」，以及計劃為議員提供專屬貴賓房服務，方便議員與賓客餐聚交流。

版權: 
禁止衍生