【獨媒報導】中國香港手球總會今日（8日）公佈，本月將舉行三項重點賽事，其中包括最高級別的「2025-2026 中國手球超級聯賽男子組（第四階段總決賽）」 ，將於馬鞍山體育館舉行。《獨媒》提到去年全運會氣氛熱烈，有否爭取於啟德體藝館舉辦賽事。中國香港手球總會董事局主席兼賽事籌委會主席何仲浩坦言「我哋係好想擺喺啟德體育園，延續返全運會嗰個氣氛」，惟啟德回覆未有檔期，感謝康文署租出馬鞍山體育館。他又門票價錢便宜，呼籲球迷組織、社團及學校購票入場支持：「真係好抵，你睇嗰陣會覺得好值嘅。因為嚟嗰啲球隊真係全國最強，呢個係一個全運會嘅翻版。」

「中國手球超級聯賽男子組（第四階段總決賽）」於10月23日至11月1日假馬鞍山體育館舉行，共有8支隊伍參戰，包括北京、江蘇、安徽、山東、上海、國家青年隊、廣東及香港。成人全日門票為120元，決賽日則為150元，65歲或以上人士及學生半價，將在10月14日Ticketflap公開發售。


陳梓朗

陳梓朗盼主場出戰衝擊獎牌

剛出戰愛知名古屋亞運、取得第五名佳績的陳梓朗稱「有少少好似夢回咗上年打全運」，指全運會後經歷兩場作客亞洲級賽事，感受到觀眾及球迷支持影響表現，對再次重回主場出擊相當興奮。雖然今次並非啟德出戰，但他不擔心氣氛不如全運會，指馬鞍山場地與看台距離近，相信「到時個氣氛或者觀眾嘅打氣聲，我哋都會聽得好清楚，氣氛會好好」。他又表明希望可以衝擊獎牌，讓公眾看到年輕球員在主場大放異彩。


許文邦

教練魏得甘或重回球隊 許文邦：只欠行政文件簽署

帶領港隊出戰亞運瑞典籍主教練魏得甘（Kim Ekdahl du Rietz）上月尾表示未與手球總會續約，總教練許文邦就透露目前續約「九成樂觀」：「只係爭咗少少一啲行政文件上嘅正式簽署」，指亞運後魏得甘正式完結合約，中間有一段空檔期，可能坊間及球員較為緊張，強調「只要有任何可以幫到球隊成長，或者令手球發展得更好，我哋都係樂意去付出去犧牲去做好多嘢」。

對於港隊需10日內打8場賽事，許文邦表示有7場比賽競爭性很高，只能盡最大努力打「好睇」比賽予觀眾欣賞，又指最期待迎戰安徽：「我哋喺全運會分組同佢打過一次輸咗，跟住四強賽同佢再打一次又係輸咗，我自己就好期待真係有一個叫做復仇嘅機會。」


張敏珊（左）

成人女子隊首次在港出戰 張敏珊盼球迷入場支持

此外，「國際手球聯會挑戰盃」女子成人組首次移師亞洲在香港舉行，港隊將迎戰朝鮮、澳門、中華台北及越南，將於10月14至18日在馬鞍山體育館展開。「24/7 FITNESS 呈獻：2026 紫荊盃沙灘手球邀請賽」則於10月17至18日在天水圍天業路沙灘手球場上演，將有中國、日本、澳門及香港作賽。兩項賽事均免費入場。

「國際手球聯會挑戰盃」為史上第一項在港舉行的女子成人組賽事，剛出戰亞運的張敏珊坦言相當興奮：「打咗 16年手球，代表咗香港隊10幾年，呢次真係第一次成年女子喺香港有比賽。」她指父母很少作客到其他國家支持，「甚至去到哈薩克又有，但喺香港佢哋可以直接過嚟支持我哋，我哋有好多朋友、隊友或我哋嘅學生……咁樣都可以真係感受到平時教佢哋，或者我哋平時講出嚟要做嘅嘢，我哋就要喺個比賽場發揮返出嚟」。

她又提到男子隊出戰全運會時「一片紅海」支持，張敏珊就當然想有大家支持，指女子隊在亞運成績不俗，惟曝光率欠奉：「其實我哋都唔錯、好努力嘅。」她指看到男子隊在全運會獲得好成績，深感香港人相當支持本地運動員，「只要你有表現，唔一定話要贏……感受到你嗰種運動嘅拼搏精神同唔放棄，即係明知重20KG都照撞埋去，我覺得呢啲係感染力，咁我覺得女子隊都有，希望更加多市民睇到」。


何仲浩

何仲浩指盼落戶啟德 惟未有檔期

《獨媒》提到去年全運會氣氛熱烈，有否爭取賽事於啟德體藝館舉辦。中國香港手球總會董事局主席兼賽事籌委會主席何仲浩坦言「我哋係好想擺喺啟德體育園，延續返全運會嗰個氣氛」。他解釋，全運會後與啟德開過數次會議，惟當時獲回覆未有檔期：「點都迫唔到俾我哋，俾到時間都係斬頭斬尾，其實我哋好想擺，又好想做中超。」

他感謝康文署租出馬鞍山體育館，指該場地本來是全運會後備場，場地符合比賽規格，有齊手球的基本設施，笑稱「啱啱喺press con之前，其實啟德體育園都打俾我問『有冇興趣出年又嚟呀？我話平啲好喎』。」

至於會否邀請球迷組織現場打氣，何仲浩指有邀請球迷組織、社團及學校到馬鞍山體育館打氣，提及場地可容納人數為1,150人，笑言「其中150個位高處不勝寒，好高嘅，所以位係有限」，呼籲大家踴躍買門票入場參與。