【宏福苑五級火】居民睇記招 冷笑、落淚 指從無關心難屬
【獨媒報導】政府昨日（10月29日）公布獨立委員會調查報告，召開記者會交代問責，大火事隔11個月，官員首次鞠躬道歉。不過理應面對居民的場合，有些居民連觀看直播機會都沒有。政府昨日中午才正式發出採訪通知舉行記者會，但偏偏與宏福苑大維修承辦商「宏業」、工程顧問「鴻毅」的案件提堂撞時間，多名到庭旁聽居民，只能散庭後收看記者會重播。
觀看記招時，聽到僅得房屋局局長辭職問責，有居民愕然：「吓，得咁少咋？」行政長官李家超說到對168人罹難「深感難過」時，有家屬不屑冷笑；提到安置時，有居民則默默低頭拭淚......
對居民、遺屬而言，大火的陰影仍然籠罩日常生活，妻子罹難的遺屬葉家駒形容至今心情仍未平復，仍然傷痛。對於特首稱「難過」，他覺得諷刺：「從來冇任何官方、個別司局長，關心、慰問過死難者家屬，呢一年嚟係點樣去面對種種困境，今日只係寥寥幾句，我好痛心特首咁『痛心』」。
指道歉太遲、欠誠意
記者每次在獨立委員會聽證會外採訪，總有居民要求政府道歉，經過近一年，終於等到問責班子鞠躬致歉。記者會上，被問到為何將近一年才道歉，李家超指要拘捕疑犯及安置居民，宏盛閣居民何小姐批評答案「好過份」、不合理，認為現在才道歉顯然太遲。
葉家駒就認為比起遲與早，道歉重點是誠意，「係咪認真為各部門失職失責，誠心向災民、168個死難者、全香港市民真誠道歉」，「呢一次，我唔係太感覺到。」「我哋得到嘅係好小嘅一個回應」。
「辭職不是問責」
調查報告指出四個部門，即房屋局獨立審查組（ICU）、屋宇署、消防處、勞工處有缺失，最終僅房屋局局長何永賢請辭，葉家駒直言「不收貨」，「係咪即係房屋局承擔其他決策局嘅任何疏失？」他認為應同等對待其他決策局，「咁先可以比我感受到往後改革係真真正正落實得到」。
葉家駒直言「精準問責」給他感覺如「高級餐廳有最低消費」，留意到建制陣營在調查報告公布前有不同風聲，包括最少一個局長落台才「收貨」，令他難免思考誰才是政府交代對象：「可能喺特首角度做咗㗎喇，究竟係向宏福苑災民、168個死者家屬交代？定係向建制派交代？」
葉家駒亦批評何永賢昨天缺席記者會，指她因政治責任請辭，昨日應該鞠躬道歉，並應明確交代是因監管轄下部門不力而辭職。
何小姐就強調，何永賢辭職不是問責落台，不覺得政府尊重死難者和災民，「只不過辭咗份工，何來有問責？」
至於政府宣布啟動「部門首長責任制」，將調查40至50名公務員，葉家駒指期望做到公平，「唔好最後就咁搵所謂前線孭咗就算，所有責任都係一層一層，上級需要為下級失誤負責，無論任何職場，政府唔應該例外。」
批強制驗樓荒謬 「點解要儲埋幾十年去搞？」
調查報告形容，大維修被歸類為「小型維修」實屬荒謬，葉家駒聽畢直言，「佢做大維修，甚至強制驗樓，都係好荒謬做法。」
葉家駒解釋，「經常性維修做得好，唔會有緊急性維修出現。你唔係等到甩皮甩骨，然後等強制驗樓令嚟一個大維修。」他指強制驗樓做法極端，「成個過程有冇人認真研究（規模）係咪可以細化？」
當顧問公司提出要天價大維修，「所有嘢剷走重新鋪過」，葉家駒認為政府不可能一味信任，「市建局係咪應該要質疑，有冇睇過係咪應該要咁做？係咪可以小修小補、縮短維修時間？」
母親及外傭罹難的李國鴻同指，平日就應該妥善修葺樓宇，「病向淺中醫，點解要儲埋幾十年先走去搞？檯面有塵你都抹下佢啦，你唔會等到成年先抹㗎嘛。」他指大維修工程項目眾多，令風險同時增加，「而家等30年先聯絡你做大維修，咁啲嘢實會有問題，咁就樣樣都走去整，但你又唔保護下裏面啲人，而家裏面住嘅人幾危險呀！」
無傳召權如砌圖缺塊
大維修成「圍標」溫床，報告亦提及大埔前區議員、被指收死人授權票的黃碧嬌，指黃的參與「令矛盾更尖銳」，但無證據她涉及「圍標」。葉家駒指，黃碧嬌加上舊法團收到的授權票，數量足以影響每個業主大會決策，「直接左右業主大會出嚟嘅決定，等於騎劫咗其他業主，呢個先係問題根本。」
葉家駒期望執法部門交代黃碧嬌調查進展，「執法部門成日開記者會，黃議員有冇接受佢哋（調查）邀請，係咪都應該開記者會呢？」
葉家駒重提一直希望黃碧嬌在聽證會作供，但獨立委員會沒有升格，缺乏傳召權，如同「砌圖有幾塊唔見咗，唔完整」。他指另外的缺塊包括置邦物業經理黎永利、舊法團主席鄧國權及舊法團顧問陳球強，三人皆沒有作供，自己曾兩度去信委員會，「強烈要求」升格為具調查權的調查委員會不果。他無奈道：「作為獨立委員會主席都唔介意砌圖冇咗幾塊，咁我哋都唔能夠可以點啦」。
憂新措施架床疊屋難
各部門公布不少「改革」措施，葉家駒憂是否可避免重蹈覆徹，「宏福苑揭露嘅問題只係冰山一角，宏福苑以外嘅有冇認真睇過？如果冇又點比信心香港市民，唔會再有第二個宏福苑？下一個屋苑唔一定係棚網、發泡膠，到時又話『原來呢樣嘢漏咗、佢又呃我』？」
葉家駒形容「修修補補所謂改革」並未觸及問題根源。他舉例近日令人譁然的臺日電梯漏裝防火框，「雖然無即時危險，但我哋當日發泡膠封窗都冇即時危險，但當有事情發生，呢啲就係致命危險。」
當局其中一個新措施，是推出「樓宇維修支援服務局」，長遠自負盈虧。葉家駒直呼「恐怖」，反問「公營機構點解要自負盈虧？即係所有嘢運作都要同金錢掛鉤，會得到一個咩結果出嚟？『你買阻燃棚網我都唔找數』，呢個咪自負盈虧。」他指明白政府財赤，認為只需改善原有部門工作，毋需新局「架床疊屋」。
李國鴻則憂慮，「越多部門就越交得波多，而家已經不停傳嚟傳去，仲要加多一個球員加多腳。」
歷投訴無門困境 改革應先改心態
大火的風險，居民災前早已告訴政府，結局本有無數改寫機會。談起改革，他們不約而同再次提起過往投訴無門的經歷，居民Ming依然不忿，指家人曾經數度投訴發泡膠封窗，不獲正視，火災前一個月看到中環華懋大廈外牆著火，家人亦曾設想假如宏福苑著火「我哋死梗」。最終火災真的發生，Ming說「其實呢啲嘢可以唔發生㗎，（記者會）一講我又諗返起嗰日唔應該發生、唔應該有嘅災禍。」
曾經向多個部門投訴，李國鴻至今常常問「投訴點解冇人理？」他指「問題一定要處理，如果唔係你改乜都冇用啦。」
災前曾與李國鴻一起見市建局的葉家駒，寄語部門正視問題，「唔好一味諗住唔關我事，唔該佢哋做嘢時諗下乜嘢係關佢事。你講咁多將來改革，如果呢個公務員諗法唔連根拔起，你點樣改都冇用。」