【獨媒報導】前西班牙國腳大衛施華周六「限定復出」一場，代表至尊沙田落場80分鐘、射入一球十二碼完成港超聯地標戰，協助球隊以1：1賽和標準流浪。對於大衛施華會否有機會再來港落場比賽，班主兼球員王至尊賽後表示，對方很喜歡香港，已曾回應「never say never（世事無絕對）」，亦很樂意指導隊中年輕球員，將會與對方保持溝通，「我覺得都有機會嘅」，「睇吓佢有冇機會嚟沙田運動場踩吓草，希望佢都再踢啦」。王至尊又分享，曾向大衛施華介紹啟德體育園主場館，對方亦態度正面表示「maybe we can play next time」。

王至尊：美中不足未能贏波

王至尊賽後向記者表示今日有逾4,500人入場支持，場面感動：「話俾人聽好多人支持香港足球，支持施華又好，支持至尊沙田又好，支持港超又好，都係一件好開心嘅事。」至於比賽方面，王至尊坦言「如果贏埋場波就完美」，認為球隊製造了很多機會，但取得入球後不夠集中，很快便被追平，又點名稱讚標準流浪門將葉嘉宇屢救險球，希望球隊之後進步，有能力留在港超聯。

被問到邀請大衛施華來港的最大困難，王至尊笑言最大困難是在踢球方面：「練兩、三課波，要融入隊波唔係咁容易，所以你問我最困難反而係要佢知隊波點踢、啲波要點轉，情況都比預期好。」他又透露十二碼原本安排由占士史葛主射，不過對方臨場成人之美，交由大衛施華操刀。有記者問到大衛施華表現如何，王至尊認為對方只發揮兩成功力：「兩成都夠做啦，練波都係咁樣，攞唔到佢個波，又唔會斷，直頭未見過咁恐怖嘅球員，好難想像佢英超當fit係點。」

指如再落場將選址沙田主場

對於大衛施華會否有機會再來港落場作賽，王至尊稱對方很喜歡香港，亦曾回應「never say never」，在短短數日中亦很樂意指導隊中年輕球員：「我覺得都有機會嘅。」他續稱會與大衛施華保持溝通，對方亦不會註冊其他球隊，「睇吓佢有冇機會嚟沙田運動場踩吓草，希望佢都再踢啦」。他又期望如對方再落場，將會落戶沙田運動場，強調「嗰度先係我屋企」。王至尊又分享，曾向大衛施華介紹啟德體育園主場館，對方亦態度正面表示「maybe we can play next time」。

對於未能與大衛施華同場作賽會否感失望，王至尊笑言通常在球隊落後下才出場，「喺1：1換我係一件唔合理嘅事」，不過早前已與對方一同練波。

林嘉緯：感覺夢幻

至於現年41歲的助救兼球員林嘉緯後備上陣，與大衛施華同場約10分鐘。他同樣對未能贏波感到美中不足：「因為始終係正式聯賽，每一分對我哋嚟講好緊要，感覺上我哋今日係可以攞到3分」。他認為在領先下再次被追和證明球隊控制力不足，教練團隊會繼續檢討，又坦言。「當然想同施華多啲時間一齊踢，但係都明白現今足球好難兩個咁大年紀喺度（落場），但係落到去都好enjoy。」

林嘉緯形容大衛施華「係我呢個年代好欣賞嘅球員」，今日可以同隊作賽感覺「好夢幻」，更指當年效力富力R&F，沒有10號球衣選擇，笑言「我都係因為大衛施華先揀21號」，得知至尊沙田邀請他加盟時已既緊張又期待：「練波已經 feel到佢嗰個能力、質素，佢嚟到其實我哋成隊人好似有打咗興奮劑咁。」

欣賞對方技術好、無架子

《獨媒》問到經過連日近距離相處，最欣賞對方甚麼地方。林嘉緯表示必定是技術，笑言「香港我自問都OK㗎啦，係咪先？」林嘉緯又主動提到有球迷指他與大衛施華踢波風格相似，他就謙稱：「你真係落到去佢隔離，你就知道佢個級數去到邊度」。

林嘉緯又大讚對方「好nice、好有禮貌」，稱「練波又冇乜架子，同埋feel到佢真係用盡佢嘅能力幫手，當然唔能夠期望喺高峰嘅時候」。他又回想第一日落場訓練「玩猜馬嬲」，指大家都非常緊張及拘謹，慢慢熟識後開始放鬆練習，而落場踢比賽時亦不會「錫身」：「你見到佢真係好有心想幫球隊贏波，真係有一種好特別感覺……好開心佢嚟到係100%想幫手」。他多次讚揚對方為人好：「你見佢成日都笑笑口，你好容易埋到去connect到，一個世界級球星嚟到，你點都會有啲緊張，但係好快已經大家好輕鬆，見到佢無端端自己都喺度笑笑口喺球場上面」。

談到班主王至尊今季邀請大衛施華，之後再有機會邀請其他世界級球星，林嘉緯即笑稱「如果你問我，係C朗！呢個係我講，講笑啫，佢係我偶像嚟嘛。」他表示：「請到可以幫手半季一季當然好，但要明白嗰個錢幾多幾誇張，一步一步嚟啦，希望我哋喺呢方面行之餘，我哋都要打好根基，我哋唔係話淨係諗住一、兩年升降機，真係有長遠計劃，你都見到年輕球員有機會一路落場，場外就交俾王老闆，場內都要做返好自己」。