參與真人騷變真球員 KiKi：等一個入球、讓大家看到努力
【獨媒報導】電視台的女足真人騷最後一幕，是球員就是否正式征戰聯賽作意向投票。新一季各級女足聯賽已經展開，球隊成員則各有發展。
不過本身是運動KOL吳慧琪（KiKi）先行一步，在10月中宣布加盟標準流浪，註冊成為足總正規聯賽球員，以「真球員」身份出戰本地女足聯賽。
真人騷結束後，不同成員的工作機會大增，特別是足球或運動相關的工作，難免引來網民嘲諷「借足球上位」。
KiKi理解大家批評，會先消化再反省自己不足，將批評化成動力，「我等緊自己入到一球先，佢哋就會知道真係有訓練同有努力。」KiKi稱會以時間證明：「好多嘢可能只係你自己一個過程，未必可以有實質嘅嘢俾大家睇到，我就係等緊有實質嘅一日。」
KiKi中學「踩波車」嚇親
KiKi今年26歲，中學時期開始玩各類型的運動，合球、閃避球、躲避球、 躲避盤、羽毛球、跑步、卡巴迪、匹克球、HYROX等，更是前卡巴迪港隊成員。球類基本上統統都接觸過，唯獨足球是兩年前參加節目後才真正開始探索。KiKi直言「以前完全冇諗過踢足球」，唯一的足球經歷是中學「踩波車」：「啲男仔成日踢波，咁咪試下玩幾下踢下，點知真係踩波車，嚇一嚇嗰隻，唔係真係跌低，我踩完之後，嘩，嚇一嚇個心離一離，跟住就唔敢啦。」
直至2024年，電視台邀請KiKi參加女足真人騷，與一眾女生挑戰由零開始，2個月內組成一支球隊比賽，她笑言「個天俾我要試下」。節目中她擔任前鋒，首兩仗友誼賽正選落場，惟終極一戰前夕的「前鋒battle」環節，失落正選一席，只能列作後備
女足節目完結後，KiKi一直沒有放低足球，過去一年在標準流浪低調跟操，直至今年10月，KiKi正式註冊為流浪球員。
《獨媒》10月底相約KiKi在流浪訓練課前受訪，她穿好流浪訓練球衣、背著匹克球運動背囊一早到場，不少流浪球員亦早早到場跑步及拉筋熱身，一夠鐘便踏出草地，進行歷時1.5小時的訓練。
KiKi：目標入一球、捉緊隊友尾巴
真人騷中，KiKi被分配到「前鋒組」，在流浪女子隊跟操，初時她對前鋒定位感到迷惘，不時向教練劉智樂請教，並持續在球隊訓練。上季中她獲邀加入，直至今季初正式註冊成足總球員，真正落場踢女子聯賽。
獲邀時，KiKi自知能力不足，曾有擔憂，「呢一個球隊嘅人真係好勁，咁我喺度諗我入去踢，同佢哋一齊訓練，我自己進步到啫，但係我驚都會拖累佢哋。」不過正因為知道自己能力差，正選落場機會低，「變咗冇咩壓力，知道落場一定唔會落我㗎啦。我跟操，唔係之前節目咁大競爭，就當繼續踢波咁樣，所以好快決定（加入）。」
成為流浪球員後，KiKi由66號球衣轉披12號，「12號係我鍾意嘅Number，因為我生日就係12號」。
問到首季的目標，KiKi說「踢前鋒最大目標一定係入波，我練習個時入到都有攬佢哋㗎。」「但係入咗呢個咁勁球隊之後，我有另一個目標就係可以捉緊到佢哋（隊友）嘅尾巴。」她提到在節目中最大的得著，是明白前鋒並非只有「入波」任務，尚有其他任務，例如在前場控制皮球，「原來我掗身位都OK，唔一定要大大隻先可以保護到個波。」
標準流浪圖片
後備上陣三場丙組賽事
KiKi在正式公布加盟流浪前，在10月初已後備上陣兩場丙組賽事，分別對戰九龍木球會及浩運。她明言喜歡流浪組織性踢法，與電視節目中的比賽有分別：「另一邊大家都係好新手，做一個戰術會有困難，所以當時策略好簡單。而家就好有組織，呢個傳去邊度再回傳，其實我偏向鍾意呢啲嘅組織，我鍾意做one touch就直接傳俾隊友，所以上次（比賽）做到一次好開心。」
提到第二場以4：1勝九龍木球會賽事，KiKi說得眉開眼笑：「上次比賽嘅時候差少少入到，完咗佢哋（隊友）都鼓勵話，『哎呀，差少少咋，但係下次一定會入到嘅』咁樣。」她又反省「我要再aggressive（進取）啲。」KiKi其中一個入球機會是對方守門員撲球失手，嘆「如果早少少我tik一tik個波呢，我都可能入到，但我都驚踢到佢個頭，所以就收咗（腳）」。
KiKI第三場上陣的賽事為11月7日，當晚在狂風大雨下，在足總足球訓練中心出戰足總盃D組賽事，以2:1小勝守曜。守曜是電視節目中球隊的友賽對手之一，KiKi下半場後備上陣近半小時，賽後向《獨媒》讚賞對方，「今次踢返佢哋都進步咗勁多」，對方中堅及防守相當強悍，難以找到機會突破防線，加上大風大雨下「個波飄嚟飄去，彈地又彈高咗再接，嗰啲位又再難咗。」對比上兩仗落場表現，KiKi認為自己「大膽咗」，首兩次僅是參與搓傳，今次則嘗試大力射門，惟踢中對方中堅，「之前冇咁大膽，射個波冇咁大力，個波食落腳面好應。」
形容初學足球如學揸筷子
每周除了球會恆常操練外，KiKi亦額外自行練基本功，如射球、對牆練習「one、two touch」等，餘下時候則練習長跑及匹克球。作為「多棲運動員」，KiKi不覺頻繁訓練辛苦，認為幾項運動能相輔相成，「踢波同pickleball都需要體能，所以練跑會有助提升，但如果齋練跑嘅話可能會悶，得閒打吓、踢吓波，再返去跑步又冇咁悶嘅。」
在訪問中，KiKi不時大嘆「足球真係好難」，她以往接觸球類活動全是用手控制，未曾試過用腳控球，而足球非常着重基本功，形容自己仍在「學揸筷子食飯」：「最困難係真係遲過人嘅基本功，人哋由細浸到大，就係好似揸筷子食飯係基本，食咩餸佢哋揀，但係如果我遲咗開始，我係學緊揸筷子，仲未可以去到揀食咩餸。」
「足球真係好難，我一路每一步都係挑戰嚟」，但亦正因如此，KiKi才想挑戰，「睇吓我自己可以踢到幾多」。
有沒有想放棄？KiKi直言「梗係有啦」，「就係佢哋（隊友）好勁，我同佢哋練習時候就會諗，但係去到比賽，佢哋會好鼓勵我，但比賽緊傳到啲波俾佢哋，又打消返呢個念頭，其實係無數次。」
網友的支持，亦是KiKi堅持動力。她跟操多時，但一直沒有在社交媒體上提及，網友以為自己沒有再踢足球，所以不時收到留言：「佢哋就話好想我踢返波，呢個就係一個動力，佢哋真係好想睇我繼續踢，同埋多咗踢波嘅人去留意我，希望佢哋唔好失望，佢哋都好想我入波。」
KiKi暫未為自己的足球路設定一個長遠目標，「keep住踢住先，幾多季我都唔係好知，因為我唔算接觸咗好耐，我未係好諗到踢成季之後會點。」
她鼓勵對足球有興趣女仔勇敢嘗試，不要介意別人批評，「唔一定係踢波，所以唔洗咁介意，搵到一班大家都鍾意踢波女仔，然後互相鼓勵真係好好多。」
劉智樂讚KiKi「積極、勤力、心態好」
流浪前鋒兼港隊代表劉智樂，由2024/25球季開始兼任女子隊教練，在女足節目曾指導部分成員進攻技巧，因而認識KiKi。劉智樂向《獨媒》指，上季大部分時間KiKi都有跟操，故邀請她加入球隊，「上季可能未準備得夠，今季叫做練咗成季之後，有機會再試下問佢有冇興趣，其實佢都ok嘅。」
「起碼係熱愛足球、落到場練波係有熱誠」，這是劉智樂對球員最低要求。他尤其欣賞KiKi跑動能力，「佢步速、加速都幾快，其實佢喺前線可能可以製造到一啲進攻機會。」他提到KiKi在第二場後備上陣的賽事，已證明有能力製造機會：「嗰次中場組織擺個直線，KiKi就打斜跑直線，跑到禁區半單刀咁，可能第一次比賽緊張啲，第一次處理呢啲情況，處理得唔係咁好，只係one touch撞到個波，唔算話自己控制點做，但係佢有個意識係要走位。」
在劉智樂眼中，KiKi是一個「好積極、好勤力，心態好好去面對啲訓練」球員。他讚KiKi每次訓練「俾足100%」，落地第一個心態並非「玩玩吓」，認真練習、研究及主動提問，但足球經驗尚淺，需要1至2年時間做好基本功，才可以站穩陣腳，又認為每人進步快慢不一，落場能否展現又是另一回事，「成季流流長，睇吓有冇機會踢好一、兩場波，都叫做俾大家見到『其實佢真係OK喎，佢唔係當足球係工具，真係自己熱愛足球』。」